“Larrutu sistema, eraldaketa gure baitan” lelopean lehen manifestakzio nazionala deitu du Ernai gazte erakundeak, larunbat honetarako, maiatzaren 3rako, Bilbon. 17:30etan abiatuko da, Deustuko zubitik. Hara joateko autobus zerbitzua antolatu du Usurbilgo Ernaik. Izen emateko zerrendak, Aitzaga, Irrati eta Txiriboga tabernetan jarri dituzte.
"Maiatzaren 3an Ernaiko gazteok gure lehen manifestakzio nazionala antolatu dugu Bilbon, ekintza eta aldarria uztartuko dituen mobilizazioa. Bertan, gazteok prekarietatera, eredu heteropatriarkalera eta hezkuntza eredu merkatilizatu, elitista eta inposatura kondenatzen gaituen sistema larrutu eta bestelako eredu baten eraikuntzan sakontzeko batuko gara. Burujabetza oinarri duen bestelako eredu baten alde zehazki", manifestakzio nazionaleko deitzaileek berri eman dutenez.
Ernai: “Bizi eredu askatzailea dugu xede”
"Nazkatuta, ogibiderik ez eta enplegu zerbitzuetako ilara luzeetan itxaron beharraz. Nazkatuta gaude gure ahotsa isilarazi eta gu geu izateko aukera ukatzen diguten borrero guztiez. Nazkatuta hezkuntza eredu arrotzez, genero inposaketez, eskubide ukapenez...
Itsu, mutu eta gor nahi gaituzte, baina gazteok ezin diogu ihes egin eguneroko zapalkuntza horri. Lehen pertsonan pairatzen ditugu sistema honen ankerkeriak eta horren aurrean ezin beste alde batera begiratu. Gure bizitzen gaineko ankerkeriak guk hartu nahi ditugu, itotzen gaituzten kate guztiak apurtu eta burujabe izan. Hautua egina dugu, bizi eredu askatzailea dugu xede eta horren alde borrokatzen dugu gogoz. Horregatik, maiatzaren 3an arratsaldeko 17:30etan Deustuko zubian egingo den manifestakzioan hitzordu garrantzitsua dugu sistema hau larrutu eta eraldaketaren alde gaudenok", adierazi dute Ernaitik.