Udal hauteskundeak 2019

#M26 EAJ-PNV: "Denontzako Usurbil bat eraikitzeko gogoak batzen gaitu”

Noaua Aldizkaria 2019ko mai. 21a, 17:44

“Datozen urteetara begira izango ditugun erronkak kontrastatzen ibili gara eta lan horren emaitzak hamar puntu hauetan bildu ditugu". EAJ-PNVren esanetan, "hitz jario hutsak baina haratago, ekimen konkretuak eta zehatzak dira herri bezala aurrera joateko eta lehiakorra izateko”. 

NOAUA! Zeintzuk dira zure alderdiak osatu duen hautes-programaren ildo nagusiak?

Josune Urkola, EAJ-PNV. Bat eginik denontzako Usurbil eraikiko dugu.    

Usurbilen etorkizuna denon artean eraikitzeko konpromezua hartzen duen  taldea burutzen dut  eta usurbildar guztien ongizatearen eta bizi kalitatearen alde lan egiteko helburuarekin aurkezten  gara. 

Gure herriarekiko maitasunak, lanerako ahalmenak, ilusioak eta  gogoak batzen gaitu, denontzako Usurbil bat eraikitzeko gogoak. Horretarako  gure herriko  ekonomia  zein kultura arloko eta gizarte eragileekin datorren urteetara begira izango ditugun erronkak kontrastatzen ibili gara eta lan horren emaitzak hamar puntu hauetan bildu ditugu. Hitz jario hutsak baina haratago, ekimen  konkretuak eta zehatzak dira  herri bezala aurrera joateko eta  lehiakorra izateko. 

Gure taldearentzat  hauek izango dira udaletxeko mahai gainean lehentasun osoa izango duten gaiak. Usurbildarrekin, Gipuzkoako Foru Aldundiarekin eta Eusko Jaurlaritzarekin  bat eginik, elkarlanean, biharko Usurbil eraikitzeko prest gaude. 

1- Usurbilgo sarrera nagusia berrantolatu.

Donostiatik datorren N-634 errepideko Usurbilgo sarrera eraberrituko dugu  biribilgune batekin, herri barruko trafikoa mantsotuz eta Atallu industrialdera bizikletaz zein oinez joateko bidea garatuz,  oinezkoei lehentasuna emanez eta Lasartera joango litzatekeen bidegorriarekin lotura eginez.   

 

2- Euskal eskola publikoarentzat zorua jarri.

Gure herriak  eskola publikoa izan dezan Eusko Jaurlaritzarekin elkarlana bultzatuko dugu eta lurzorua jarriko dugu. Egun  Jaurlaritzako Hezkuntza Saila 2019-2022 aldirako inbertsio-planaren diseinua egiten ari da eta udalak lur-sail bat jarri behar du ikastetxe bat eraikitzeko prozedurak hasteko. 

 

3- Jarduera ekonomikoa bultzatu.

Enpresen eta merkatarien egoera eta kezkak ezagutu eta gertutasunetik bideratuko ditugu, herriko ekonomia suspertzeko eragile bilakatuz eta  hutsik dauden eremuak berriro erabiltzeko modua eginez. Usurbilgo Udala bide-lagun bihurtuko dugu industria eta merkataritza proiektuak gauzatu daitezen. 

 

4- Auzoetako irisgarritasuna hobetu.

Usurbil herri  aldapatsua da eta Kaxkotik gertu dauden auzoetan,  (Etxealdia edo Kalezar) irisgarritasun arloan ditugun gabeziak aztertu eta  lehentasunak jarriko ditugu eta  datozen lau urteetan proiektuak garatzeko beharrezko izango diren  hitzarmenak sinatuko ditugu.   

 

5- Kirol instalazio gabeziari erantzun.

Hainbat klubek egiten duten lana eta dagoen eskaria kontutan hartuta erantzun eraginkor bat landuko dugu. Horretarako instalazio estali bat eraikiko dugu egungo kiroldegi ondoko Zelai Txiki futbol pareko enparantza borobilean, edota ikastola aurreko Gernika ibilbideko eremuan.   

 

6- Hondakinen kudeaketa berrikusi.

Usurbil aitzindari izan da hondakinen  bilketan. 11 urte igaro ondoren sistema berraztertu egingo dugu, gabeziak aitortu eta modu eraginkor eta merkeagoak proposatu, izan ere egungo sistemak urtero 250.000 euro baino gehiagoko zuloa sortzen digu guztionak diren udal aurrekontuetan.   

 

7- Auzoak bertaratu.

Beste ezaugarrietako bat auzo asko dituela da: Aginaga, Txokoalde, Santuenea, San Esteban, Kalezar eta Zubieta, batzuk  herri ingurunetik urruti ere bai. Hau konpontzeko herri barruko garraioa bultzatuko dugu.  

 

8- Puntu beltzak landu eta irtenbidea eman. 

Jakitun gara gure herriak dituen puntu beltzetaz, hala nola, Troia, Txokoalde, Etxealdia edota Santueneko zubia. Beharrezkoa deritzogu puntu hauei guztiei irtenbidea aurkitzea eta horretarako Foru Aldundiarekin eta Eusko Jaurlaritzarekin plangintza adostu eta  bateratu bat gauzatuko dugu.

 

9- Landa eremuetakoen bizi kalitatea hobetu.

Landa eremuetako bizi kalitatea bermatuko dugu, baserritarrekin elkarlanean baserri-bideen egoera aztertu eta berritzeko egoeran daudenak berritzeko plangintza egingo dugu. Zelaien eta gune berdeen mantentze programak ere bultzatuko ditugu.   

 

10-  Bizikidetza landu. 

Usurbildarron arteko elkarbizitza eta memoria landuko dugu. Horretarako Gipuzkoako Foru Aldundiak  ematen dituen laguntzak erabiliko ditugu  ekimenak gauzatzeko. Arrazoi politiko bat bera ere ezin da etikaren eta giza eskubideen errespetuaren oinarrizko printzipioen gainetik jarri.  

 

Udal zerrenda

1. Josune Urkola Larrarte.

2. Mirari Azurmendi Sorazu.

3. Carlos Perez Fraisoli.

4. Andoni Atxega San Sebastian.

5. Lourdes Jauregiberri Goenaga.

6. Agurtzane Egibar Artola.

7. M. Jose Ibargoyen Lizarazu.

8. Juan Maria Zubeldia Arrieta.

9. Jose Maria Zubiria Eguzkiza.

10. Juan Gorostidi Echeverria.

11. Esteban Goenaga Otegi.

12. Miren Elisabet Ecenarro Ganzarain.

13. Joseba Iñaki Illarramendi Echabe.

 

Ordezkoak:

1. Fernando Arrieta Olasagasti.