Urte amaierarekin batera bueltan datorkigu Xiberoako ikastolak laguntzeko elkartasun kanpaina. Iaz guztira, 1.400 saski saldu eta 15.000 euroko laguntza jaso zuten. Usurbilen marka guztiak hautsi zituen elkartasun kanpainak; guztira 114 Ahüzki eta 245 Irati otar saldu ziren.
2003an martxan jarritako ekimen honen sustatzaileek egunotan nabarmendu dutenez, "Zuberoan ikastolak garatzen eta indartzen jarraitzeko Euskal Herri guztiko elkartasuna ezinbestekoa zaigu". Bi ikastola ditu egun Zuberoak: 36 ikasle dituena Alozen eta 103 ikasle dituena Sohütan. Euskarak babes ofizialik ez duela eta etxeko transmisioa eteten ari dela ohartarazten dute.
Elkartasun kanpaina honek berebiziko garrantzia du beraz. Ohi bezala, Xiberoko Usurbilgo lagun taldearen eskutik heldu da. Otarrak NOAUA! bidez eskatu ahalko dituzue; Bordaberri 3ko kultur elkartearen egoitzara etorri eta zuen izen abizenak, telefono zenbakia eta eskuratu nahi duzuen otar kopurua zehaztu. Bestela, email bidez eskatu honako helbide honetan: xiberokootarrakusurbil@gmail.com . Eskaerak abenduaren 8a baino lehen bideratu beharko dira.
Otarrak, NOAUA! Kultur Elkarteak antolaturiko abenduaren 15eko San Tomas Azokaren baitan Xiberoko lagunek jarriko duten postuan banatuko dituzte. Ohi bezala, azokaren amaieran Xiberoko ikastolentzat bildu duten laguntzaren berri emango dute. Otarrak eskatu baina azokara gerturatu ezin duzuenok, abenduaren 16tik 20ra jaso ahalko dituzue NOAUA!ren egokitzan.
XIBEROAKO PRODUKTUDUN OTARRAK
Irati
Produktuak: ardi gazna (450 g), ahate gibela (125 g), bixkotx poltsa bat artisanala (150 g), eztia (500 g), euskal xerriki lukainkak (400 g), axoa xahalki xehatua saltsan (640 g).
Prezioa: 52 euro.
Ahüzki
Prezioa: 40 euro.
Produktuak: ardi gazna (450 g), ahate gibela (125 g), bixkotx poltsa bat artisanala (150 g), eztia (500 g), euskal xerriki patea (200 g), euskal xerriki odolkia (200 g).
Informazio gehiago: ikaskoli.eus
