Puzgarrietan jauzika ikusi ditugu gehienak, begira parean zituzten bideo jolasetan iltzatuta besteak, marrazkiak sortzen taldetxo bat... Bakoitza erakargarriena zitzaion txokora hurbildu eta aisialdi gune erraldoiaz gozatzen hasia da, Usurbilgo Udalak ostegun goiz honetan Oiardo Kiroldegian zabaldu duen Gabonetako Haur Parkean.
Pixkanaka oporretako azken txanpara hurbiltzen doaz, urtarrilaren 8an ikasgeletara itzuliko diren haur eta gaztetxoak, baina oraindik badute jai egunoz gozatzeko aitzakia bat baino gehiago.
Usurbilgo Udalak antolaturiko jostaleku handia 2-12 urte artekoentzat zabalik dute hiru egunez Kiroldegiko erabilera anitzeko pistan. Hiru eremuetan banatuta; 2-6 eta 6-12 urte artekoentzako txoko bana izango du jolastokiak eta hirugarren bat guztientzako partekatua.
Gabonetako Parkea
Egunak: urtarrilak 2, 3 eta 4.
Ordutegia: 11:00-13:00/16:30-19:30.
Tokia: Oiardo Kiroldegia.
Guneak:
-2-6 urte artekoentzat: margolarien gunea, ludoteka psikomotrizitateko aparailuekin, puzgarriak.
-6-12 urte artekoentzako gunea: puzgarriak, ohe elastikoak.
-Guztientzako gunea: saskia, futbolina, haize mahaia, egurrezko 10 joko.
-Tailerrak adin guztientzat.
-Urtarrilaren 4an, Diskofesta parkearen itxieran.
Antolatzailea: Usurbilgo Udala.
