Astelehenetik ostiralera ETB1-ek eskaintzen duen "Joseba Arguiñano Sukalerrian" saioara egunero lagun bat sukaldatzera gonbidatzen dute. Gaurkoan (uztailak 10) Idoia Torregarai NOAUA! K.E.-ko lehendakariak parte hartu du. "Umorearekin lotutako proiektu asko egin ditu Idoiak, eta alaitasuna eta freskotasuna ekarriko dio "Joseba Arguiñano Sukalerrian" saioari", iragarria zuten ETB-tik.
Umorea, umorearen onurak, emakume umoregileen lana goraipatu du Torregaraiak. Solasean aritu diren artean Idoiak eta Josebak "begetarianoentzat aproposa den platera prestatuko dute: barazki erreak gazta freskoarekin, fruitu lehorrekin egindako ozpin-oliotan".
Sukalde kontuetan murgilduak daudela, euskal ekoizleekin ere egon da ETB-ren programa. Tartean, Zubietako Ameri Goikoa baserrian. Tomas eta Eneritz Imaz aita-alabek etxeko ekoizpenaren berri eman diote Euskal Telebistari.
Albiste honi atxikiak dituzue saioko bi bideo. Programa osorik, eitb.tv atarian ikusi ahalko duzue.