Zubietako erraustegia

"Osasuna, ingurumena, justizia" babesteko GuraSOSek deitutako giza katea larunbatean

Noaua Aldizkaria 2021ko urt. 22a, 08:42

Larunbat goizeko 11:50ean finkatu du hitzordua GuraSOSek Donostian. Hiriburuko lau puntu sinboliko lotuko ditu giza kateak. Puntu sinboliko hauek lau eremuetan banatuko dute segurtasun neurrietara egokitua egongo den mobilizazioa. Ostiral honetan Eusko Jaurlaritzak onar ditzakeen neurri murriztaile berrien aurrean, giza katean parte hartzeko deia egin du GuraSOSek. Herriak perimetralki konfinatzea agintzen badute, horrek manifestaziorako oinarrizko eskubidea ezin duela eragotzi ohartarazi dute deitzaileek.

"Osasuna, ingurumena eta justizia" aldarripean GuraSOSek antolatu duen giza katearen bidez, "erakundeek segurtasunarekiko, osasunarekiko eta ingurumenarekiko duten mespretxua salatu nahi du mobilizazioak eta eskari hau sinbolizatzen dute lau puntuek. Era berean justiziak dagokion legezkotasun-kontrola egin dezan eskatu nahi da".

Erraustegia salatzeko
Azken egunotan erraustegian izan eta GuraSOSek salatu duen hirugarren sutea gertatu berritan egingo da giza katea, "errauskailua geldiarazteko EAEko Auzitegi Nagusian berehala aurkeztuko duen eskaerarekin" ere egokituko da. 

"Era berean, GHK-k egindako ohartarazpen onartezina salatzeko ere balioko du; izan ere, herritarren salaketengatik lege-ekintzak abiarazteko ohartarazpena egin zuen, eta ohartarazpen hori bateraezina da ingurumenaren defentsarako nazioarteko eskubidea askatasunez egikaritzearekin".

Parte hartzeko deia
Ostiral honetan Eusko Jaurlaritzak onar ditzakeen neurri murriztaile berrien artean da, herriak perimetralki itxi edo konfinatzea. GuraSOSetik ohartarazi dutenez ordea, erabaki hori hartuko balute, horrek ezin du eragotzi larunbat honetan, Donostiako giza katean parte hartzera joatea. Bestela esanda, ezin du manifestatzeko oinarrizko eskubidea galarazi.

Gipuzkoako edozein udalerritik giza katera joateko mugitzeko eskubidea soilik "salbuespen-egoeran" edota "setio-egoeran" eten daitekeela gogorarazi du guraso elkarteak. Horregatik, manifestatzeko oinarrizko eskubidea inolako eragozpenik gabe gauzatu ahal izatea bermatzeko neurri berri bat hartzea eskatu dio GuraSOSek "Ertzaintzaren buruzagitzari". Udalerrien itxiera perimetrala zaintzeko ardura duten agenteei euren jardunerako irizpide hau kontuan hartu dezatela: larunbat eguerdiko 12:00etan Gipuzkoa osoari zuzenduriko mobilizazioa deitua dagoela Donostian eta itxiera horrek ez diola eragiten hitzordu horretara joateko mugikortasunari ezta manifestatzeko oinarrizko eskubideari, ezta mobilizatu ostean etxera itzuli ahal izateari ere".

Neurri berritzaileak betetzeko deia
Albiste honi atxikitako kartelean duzue giza kateari buruzko informazio zehatza eta baita oso kontuan hartzeko ohar bat ere; "elkarrekin bizi ez direnen arteko distantziak gordeko dira".

Bizi dugun osasun krisialdia tarteko, antolakuntzak ezarriko dituen segurtasun neurriak betetzeko lankidetza eskatzen die GuraSOSek mobilizazioan parte hartuko dutenei. "Antolaketak ahalegin berezia egingo du pilaketak saihesteko, eta horretarako honako neurri hauek hartu dituzte, horietako batzuk berritzaileak", iragarri du GuraSOSek.

Batetik, aurrez antolatu izan duen mobilizazioen amaierako ekitaldirik ez da izango oraingoan, "ez behintzat ohiko moduan", GuraSOSen esanetan; streaming bidez eskaini asmo dute. "Azken ekitaldian jendetza bildu ez dadin, antolatzaileek streaming bidez (zuzeneko emisioa) emango dute ekitaldiaren amaiera (azken adierazpena eta ekitaldiaren itxiera), eta parte-hartzaileek telefono mugikorretatik jarraituko dute, dauden katearen tokian. Esteka gurasos.org webgunean egongo da eskuragarri. Itxiera ekitaldia 12:15ean izango da".

Musuko gorriak
Horrekin batera, mobilizaziorako musuko gorriak banatuko dituzte, "GuraSOSen logoa simulatuz. Logoan maskara hori agertzen da, kutsadurak eragindako arriskuaren ikur gisa". Ondoko argazkian dituzue GuraSOSek asteazkenean Donostian eginiko agerraldian, elkarteko ordezkariak aipatu musuko gorriekin.

Lehen aipaturiko oharra; "katean bizikidetza-unitateak bakarrik egon ahalko dira elkarrekin. Gainerakoak eta bizikidetza-unitateak elkarrengandik 3 metrora egongo dira, eta, horrela, kontakturik gabeko kate bat osatuko dute".

Antolaketa hau guztia bideratzeko lan talde zabala osatu du GuraSOSek. "20 bolondres arduratuko dira katea antolatzeaz eta dagozkion jarraibideak emateaz. Hori bai, komunikabideen laguntza eskatzen da jarraibide horiek zabaltzen laguntzeko eta deialdian parte hartzen duten pertsonei antolaketaren jarraibideak betetzen laguntzeko".

Kate zatiak eskualdeka
Jende pilaketak saihesteko antolakuntzak lau zatietan banatuko du ibilbidea. Zati bakoitzean eskualde ezberdinetako herritarrek parte hartu ahalko dute. Bakoitzak dagokion kate zatian egon beharko du, mobilizazioa hasi baino 10 minutu lehenago, 11:50ean:
1. zatia.- Andia-Diputazioa: Urola Kosta Debabarrena
2. zatia.- Diputazioa-Okendo/Askatasunaren hiribidea 5 (Bankoa) Debagoiena-Goierri-Tolosaldea
3. zatia.- Askatasunaren hiribidea, 5. zk., Santa Katalina zubia: Donostialdea
4. zatia.- Urumea- Kalkuta plaza: Oarsoaldea-Bidasoa-Buruntzaldea