Covid19ak iaz etendako Donostiako Klasikoa ere bueltan da aurtengo udan. 224 kilometro luze izango ditu uztailaren 31n ospatuko den proba entzutetsuak. Herrialdeko kostaldea zeharkatuko dute lehenik txirrindulariek, 6 mendate igo beharko dituzte, baita hainbat udalerri ere; tartean Usurbil.
Donostiako Alderdi Ederretik 11:30ak pasatxoan abiatu eta Gipuzkoako hiriburuko Bulebarrean amaituko da, 17:30-18:00 artean. Donostiatik zuzenean Usurbilera helduko dira txirrindulariak N-634 errepidetik barrena, 12:05 aldera. Usurbildik Aginagara joko dute gero eta handik Oriorantz.
Edizio honek 2019koak baino 2 kilometro gutxiago izango dituela ohartarazi du antolakuntzak, "baina beste edizio batzuetakoa bezain gogorra izango da. Ikuskizuna bermatuta dago", iragarri dute.
