Aurtengo Master Laboral Kutxaren VII. edizioan 65 pilotarik hartuko dute parte, tartean Miriam Arrillaga aginagarrak. Pilota Goxuan 25 pilotari arituko dira, pilota mistoan gazteen kategorian 24, pilota mistoko 1.mailan 8, eta azkenik, Arrillagak parte hartuko duen pilota mistoko elite mailan beste 8.
Iaz, pilota mistoko elite mailan Olatz Arrizabalagak eta Enara Gamindek jantzi zuten txapela, baina aurten ez dute bikotea osatuko. Larrarte-Arrillaga, Arrizabalaga-Capellan, Aldai-Mendizabal eta Garai-Gaminde bikoteak arituko dira nor baino nor aurtengo txapela eskuratzeko. Denak denen aurka arituko dira eta ligaxkako sailkapenaren arabera jokatuko dituzte Laudioko finalerdiak, lehenengoak laugarrenen aurka eta bigarrenak hirugarrenen aurka.
Mungian hasiko da txapelketa eta martxoaren 26an amaituko da Zarauzko Aritzbatalden. Finalerdiak (martxoaren 12an) eta finalak EITB1en bidez jarraitzeko aukera izango da.