Angularen 2025-26 denboraldiko arrantza kanpaina bertan behera uztearen alde egin du Eusko Jaurlaritzaren Elikadura, Landa Garapen, Nekazaritza eta Arrantza Sailak, egunotan jakinarazi dutenez. Helburu argi batekin hartu dute erabakia; "helburua da espeziearen murrizteari aurre egitea eta egoera horri buelta ematea. Alde zientifikoak aingiraren erabateko desagerpena saihesteko proposatzen duenarekin bat dator erabakia. Eusko Jaurlaritzako Elikadura, Landa Garapen, Nekazaritza eta Arrantza Sailak lanean jarraituko du espeziea berreskuratzeko eta haren eta haren ingurunearen garapen jasangarria sustatzeko. 2024-2025 azken kanpainan, espezie horretako 198,44 kilo harrapatu dira guztira, horretarako baimena duten arrantzaleen adierazpenen arabera".
Erabakia egunotan jakinarazi die bilera bidez Euskadiko Angulero Elkarteko kideei. "Egoera atzeraezina izan aurretik espeziea berreskuratzeko neurriak" indartzea beharrezkotzat jo du Jaurlaritzak.
"Hainbat txostenetan oinarrituta hartu dute erabakia, eta txosten horiek ohartarazten dute orain arte aplikatutako neurriek ez dutela balio izan espeziearen egoera kritikoari buelta emateko".
Zehazki zenbait txosten aipatu ditu Jaurlaritzak hartutako erabakia argudiatzeko. "Alde batetik, joan den udaberrian Espainiak Europako Batzordeari aurkeztu zion Angularen Kudeaketa Planaren ebaluazio osteko azken txostenaren ondorioak daude", Jaurlaritzaren esanetan. Txosten horren arabera, "aingiraren iheserako eta errekrutatzerako helburuak urrun daude oraindik Europako Kontseiluaren 2007ko Araudian ezarritako helburutik. Gure ibaietako aingira-kopurua 60ko eta 70eko hamarkadetan bizi zirenen % 7 baino ez da. Orain arte, hainbat neurri aplikatu dira, hala nola arrantza-jarduera mugatzea edo habitataren kalitatea eta ibai-konektibitatea hobetzea. Txostenaren arabera, neurri horiek ez dute lortu aingiraren egoera larriari buelta ematea, eta, beraz, haren izakinak muga biologiko seguruetatik kanpo jarraitzen du".
Horrez gain, "ekainaren lauko Arartekoaren Ebazpena gehitu behar zaio; horrek gomendatzen du ibai-aingiraren populazioa berreskuratzeko neurrietara egokitzen den angularen arrantza arautzea. Arartekoak azpimarratu du neurri arautzaile horiek irizpen tekniko eta zientifikoetan oinarritu behar direla, eta Euskal Autonomia Erkidegoko ibai-aingiraren Kudeaketa Planaren esparrura egokitu behar direla".
Ildo berekoak dira AZTI-ren txostenak, Jaurlaritzaren arabera. "Itsasoa Esploratzeko Nazioarteko Kontseiluko (ICES, ingelesez) Angularen Lan Taldearen bileran aurkeztuko da txostena, eta organo horrek ematen dio aholkua Batzordeari, Urteko Harrapaketa Tasaren proposamenak eta arrantza-espezieen kuotak egiteko. Halaber, txostenak azpimarratu du ez dagoela espeziea errekuperatzen ari den zantzurik".
Txosten horietan guztietan aipatzen dena aintzakotzat hartuta, aipatu moduan, "Elikadura, Landa Garapen, Nekazaritza eta Arrantza Sailak 2025-2026 angularen arrantza kanpaina bertan behera uztearen alde egin du. ICES-en txostena jaso bezain pronto Lan Mahaia sortuko da azaroan 2010. urteko Angularen Kudeaketa Plana berritzeko. Horretan, Gipuzkoako eta Bizkaiko foru-aldundiek parte hartuko dute, baita AZTIko eta EHUko zientzialariek, Euskadiko Angulero Elkarteak eta ekologista taldeen ordezkari batek ere, espezie horren kontserbazio-egoera hobetzeko eta arrantza berreskuratzeko neurri berriak hartzeko".