Azken urteotako ohiturari jarraiki, Soinurbil Musika Astea Usurbilgo herri eta auzoetara hedatzen darrai Zumarte Musika Eskolak. Emanaldietako bat Zubietan du antolatua larunbat goizerako, martxoaren 14rako, 11:30etan; Gora Musika! Dantzan. Aurretik, beste hitzordu bat iragarria dute ostegun honetarako, hilaren 12rako, kasu honetan, Aginagako Eliza Zaharra Elkargunean. Zumarteko talde instrumentalek emanaldia eskainiko dute, arratsaldeko 18:30etan hasita.
Zumarteko musikariek eta abesbatzako kide gazteenek asteazken arratsaldean Hernaniko musika eskolakoekin batera Sutegin emandako kontzertuaren ostean dator gaurko saioa. Urtero sustatzen duten truke esperientzien baitan, hernaniarrak izan ziren atzo Sutegin. Usurbilgoak izango dituzte udalerri horretan kontzertua eskaintzen apirilaren 29an.
22. Soinurbil Musika Astea
Martxoak 12, osteguna
18:30 Zumarteko talde instrumentalen kontzertua Aginagako Eliza Zaharrean.
Martxoak 13, ostirala
19:00 Hugo Silveira Quartet Mikel Laboa plazan.
Zehaztasunak: "Hugo Silveira Quartet honako musikariek osatzen dute: Carlos Velasco musikaria gitarran elektrikoan, Naldo Gomes brasildarra perkusio-baterian, Pablo Zarate baxu elektrikoan eta Hugo Silveira, gitarra eta ahotsa. Konpositore brasildarrak Hugo Silveira Quartet bere proiektua aurkeztuko du, Brasilgo erritmoak jazz, funk eta rock eraginekin uztartzen dituen konposizio berria. Bere errepertorioak Brasilgo konpositore berrien eta artista ospetsuen bertsio interesgarrien belaunaldiak ere biltzen ditu".
Martxoak 14, larunbata
11:30 Gora Musika! Dantzan, Zubietako frontoian.
Zehaztasunak: "Sorgin bat, Tartalo eta Basajaun geratuak dira Marirekin jolasteko. Bidean, euren gorputz eta arropekin barre egiten duten hainbat pertsonaia ezagutuko dituzte eta ondorioz, beraien itxurak zalantzan jartzen dituzte. Hortaz, kritikak jasotzen dituzten heinean, magiaren bitartez haien gorputza aldatzen dute, gaur egungo kanonetan oinarrituz. Ostean, guztiz aldatuta iristen dira Mari ezagutzera. Berak ez ditu ezagutzen, haserretu egiten da eta haiekin jolastu nahi ez. Berraztertzen dute egoera eta magiaren bidez, lehen zeuden modura itzultzen dira. Orain, Mari pozik dago bere lagunak ezagutzen dituelako eta elkarrekin dantzatzen dute".
Sarrerak: 8 euro, usurbilkultura.eus plataforman.
18:30 Basabi taldea: "Oma" Sutegiko auditorioan.
Zehaztasunak: "Oma lanean, Basabik osagai berri bat txertatu du, taldearen hastapen folkloriko eta klasikoenetatik urrunduz: elektronika. Ordubetez, soinu-paisaia berriak miatuko dituzte, gizakiak kanpoko eremuetan izan duen esku hartzea irudikatzeko. Euskal Herriko Urdaibaiko biosferaren erreserban dagoen Oma bailaratik (Kortezubi) hartu dute izena; bailara horretako basoa oso ezaguna da Agustín Ibarrolak egindako lanagatik. Kontzertu hau artista haren lanaren eskutik egingo da, eta haren-horma irudiak inguratuko ditu bertaratuak, pieza berritzaile honen soinu-diseinuari lagunduz".
Taldekideak: Biolina : Iñigo Coto/Biola: Marina Barredo/Txeloa: Belen Fernandez/Txalaparta: Txomi Dhers eta Sergio Lamuedra/Bideo Instalazioa: Paula Segura/Eszenografia: Jon Begiristain.
Sarrerak: 8 euro, usurbilkultura.eus webgunearen bidez.
Martxoak 15, igandea
12:00 Berako musika banda kalean.
Zehaztasunak: "Berako Musika Banda 2000ko hamarkadaren lehen urteetatik aurrera egonkortuta dagoen taldea da. Usurbilgo kontzertua Aitor Mitxelenak zuzenduko du".
Antolatzaileak: Zumarte Musika Eskola eta Usurbilgo Udala.
Laguntzaileak: Salbatore Parrokia eta Gipuzkoako Foru Aldundia.