Aginagakoek udako Usurbilgo herri eta auzoetako jaien denboraldiaren amaiera ekartzen dute. Haiekin bat egin du, gainera, bigarren urtez segidan, Lauburu Usurbilgo Erraldoi eta Buruhandien Konpartsaren biraren bukaerak ere.
Azken aldiz ikusi ditugu aurtengoz, San Praixkuetako ostiral honetako, urriaren 9ko Umeen Egunaren bukaeran. Aurtengo azken kalejira egin dute, Ixabel eta Ixidro erraldoien azken dantza erakustaldi ederraz gozatu ahal izan dute hitzordura joandakoek.
Dultzaineroekin batera, herri erdigunean barrena eginiko birak iazko eta aurtengo udako gainerako festetan gertatu moduan, zaletu eta bidelagunen komunitate fidela erakarri du.
Lauburuk ere ekainaz geroztik izandako hango eta hemengo jaiak girotzen eta jendea erakartzen aritu da bigarren urtez segidan; batzuk erraldoiei begira egon ohi dira. Haiek buru izandako kalejiraren jarraitzaile sutsuak baditu Lauburuk. Noski, tartean bueltan ibiltzen dira, Usurbilgo herri nortasunaren irudi diren sei buruhandiak ere: Aginagako erriberako angularia eta Mapileko arotza, aharia, oilarra, errotaria eta basurdea.
Aginagako jaietako aurtengo azken kalejiran ere bizi asko mugiarazi dituzte bertan bildutakoak.
