Bide mozketei lotutako ohar baten berri eman du Usurbilgo Udalak. Izan ere, ostegun honetatik, urriaren 22tik hasita hiru astez eta zenbait orduz, ibilgailuen joan-etorrietarako bidean mozketak izango dira Aginagan, Iarbeko bidegurutzea eta Fermiñenea arteko bidean. Udaletik jakinarazi dutenez, "Arratzaingo ur-sarea egokitzeko lanak egingo dira. Zehazki, Fermiñenetik Iarbeko bidegurutzeraino egingo dira lanak, 300 metroko tartean: hoditeria berritzea da lanen helburua".
Lanon ondorioz, "ibilgailuentzako mozketak izango dira, 07:45etik 14:00etara; oinezkoek pasatzeko aukera izango dute". Gainerakoan, Udaletik jakinarazi dutenez, "obrak eginagatik, ur horniduran ez da mozketarik ez bestelako eraginik izango". Lanok hiru asteko iraupena izatea aurreikusi dute.