Atxegalde festa giroan murgiltzen da urtero, hasiera ekitaldi ofizialaren aurretik. Aurtengoa ere ez da salbuespena izan. Gaur arratsaldeko 20:00etan ospaturiko abiatze hitzordua baino lehen, txaranga doinuen eskutik parrandaz giroturiko asteburua bazetorrela argi utzi nahi izan dute kalejira bidez.
Atxegaldetik bertatik abiatu dira, auzoko eremua gainditu eta herri erdiguneraino eraman nahi izan dute festa giroa. Bertan, Dema edota Mikel Laboa plazan eginiko geldialdietan abesti ezagunen erritmora jarri dute dantzan ingurua. Herri erdiguneko itzulia osatuta, abiapuntura, Atxegaldera bueltatu dira irudiotako musikariak, Lasarte-Oriako Arranopola txarangakoak eta haiekin, bidea osatu duten auzokide eta herrikide gehiago.
Txupinazorako zubi-lana egin dute, plazan bildutakoekin batera. Haiek ekarri dute festa giroa bueltan Atxegaldera.
