Ramon Lertxundi Saizarren izenean joan zen parte hartzera joan zen ostegunean, baina alboan izan zuen laguntzaile lanetan Koldo Arrieta. “Discarlux haragi etxeko Gipuzkoako komertziala da Koldo Arrieta, eta harekin batera aritu nintzen. Guztiontzat berdin izan zen, parrilero bat eta alboan beste pertsona bat laguntzaile lanetan. Guztira 8 lehiakide ginen, bakoitza toki ezberdin batekoa”, esan du Ramon Lertxundik. Saizarko parrilleroak ez zuen parte hartzen lehen aldia, baina bai lehena irabazten: “Beti egon izan naiz finalisten artean, baina hau nuen irabazten lehen aldia. Aurtengo txapelketa amaitu ostean, egindako lanarekin oso gustura geratu naiz, baina 50 epaileren adostasuna lortzea zaila da. Oso emaitza ederra lortu dugulakoan nago”.
Urte luzez egindako lanaren emaitzaren ondorioa dela uste dute garaipen hau Saizar sagardotegikoek. Hala ere, ondotxo dakite lanean jarraitu behar dutela bezeroak besoak zabalik hartzeko. Izan ere, Ramon Lertxundik ia bizitza osoa darama Saizarreko parrilan lanean eta oso ondo ezagutzen du sagardotegiko egunerokotasuna. “14 urterekin, osabarekin ibiltzen nintzen laguntzaile lanetan, baina jubilatu zenean, ni hasi nintzen parrilan, nahiz eta aitak beti laguntzen zidan. Ordutik, egunero parrilan ibiltzen naiz, horregatik beti esaten dut, nire ustez, ni bezain beste txuleta inork ez dituela erre Euskal Herri osoan”, adierazi du Saizarreko parrileroak.
Horrelako lehiaketa bat irabazteko esperientzia giltzarri da, baina Ramonek baditu sekretu gehiago parrila lan on bat egiteko: “Haragia ona egoteko nik beti haragia kamaran edukitzen dut bere tenperatura egokian. 40 zinta inguru eta denak heldutasun denbora ezberdinekoak. Gero, goizean goiz kamaratik ateratzen ditut giro tenperaturara egokitzeko eta mozteko. Erretzeko momentuari dagokionez, nik urteekin ikasi dut eta dena begi bistarekin egiten dut. Haragia nola dagoen ikusteko gai naiz soilik bere koloreari begiratuz eta badakit zenbat denbora behar izaten duen haragiak bere puntuan egoteko”. Datorren urtean ere, asmoa du berriz parte hartzeko. Orain arte parrila kategorian hartu du parte beti, baina bestelako aukeraren bat suertatuz gero, agian, beste kategoriaren batean ere parte hartuko luke.