2023-24 ikasturtea

Haur Eskolako kuotei buruzko bilera gaur

Noaua Aldizkaria 2023ko api. 18a, 07:46

Datorren ikasturterako matrikulazio epea ireki berritan, Haur Eskolako kuotei buruzko argibideak emateko bilera deitu du Usurbilgo Udalak gaurko.

Astelehen honetan ireki du Haur Eskolak 2023-24 ikasturterako matrikulazioa. Zerbitzu hau baliatzeko kuotak hizpide izango dituen hitzordua deitu du gaurko, apirilak 18, Usurbilgo Udalak. "Hezkuntza Legea eta haur eskolak: 2023-24 ikasturteko kuoten inguruko argibideak" emateko hitzordua iragarri du, aipatu moduan astearte honetarako, arratsaldeko 18:00etan Sutegin.

Matrikulazioa
Aipatu moduan, zabalik da apirilaren 28ra arte 2023-24 ikasturtera begirako matrikulazio epea Haur Eskolan. Deialdia 0-3 urte artekoei zuzendua dago; bestela esanda, 2021-23 urte artean jaiotakoei.

"Behin ikasturtea hasita, Haur Eskolak eskaintzen duen zerbitzuaren beharra izango duzuela aurreikusten baduzue, matrikulazio garaian gurekin harremanetan jartzea eskertuko genizueke, epez kanpoko izen-emateei ezin baitiegu plaza eta ordutegia bermatu", ohartarazi dute Haur Eskolatik.

Matrikulatzeko hitzordua eskatu beharko da aurrez, informazio gehiago ere jaso daitekeen bideotatik hain zuzen:
943 36 12 16 (8:00-15:00 artean)
haureskola@udarregi.eus
Ugarte, 9

Ate irekien eguna
Horrekin batera, gogoan izan, matrikulazio epea ireki berritan, ate irekien eguna antolatu du Haur Eskolak; apirilaren 19an hain zuzen, asteazkenez; 17:00etan euskarazko saioa eta ordubete beranduago, 18:00etan gaztelaniazkoa.