Haurtzaindegien Partzuergoak, Eusko Jaurlaritzak finantzatutako doako zerbitzuak, haurrentzako kalitatezko hezkuntza goiztiarra bermatzen duela gogoratu du alderdiak. Zentzu horretan, Usurbilgo EAJ-PNVk “funtsezkotzat” jotzen du Partzuergoan sartzea haurtzaindegi-zerbitzuaren doakotasunari eutsi eta epe luzerako finantzaketa ziurtatzeko.
Egun, Usurbilgo Udalak 200.000 euro bideratzen ditu 2023-2024 ikasturtean zerbitzuaren doakotasunari eusteko. Datorren urterako, “gurasoek 40 eta 60 euro arteko hileko kuotari aurre egin beharko diote zerbitzuaren finantzaketa bermatzeko”, jakinarazi du Eusko Alderdi Jeltzaleak.
Hezkuntza-zerbitzuak kokatuta dauden egungo eraikina zaharkituta dagoela gogorarazi du eta ez dituela eskatutako kalitate-estandarrak betetzen. Horregatik, Usurbilgo EAJ-PNVk hezkuntza zerbitzu guztiak esparru berean, Udarregi ikastolaren inguruan, batzearen alde egiten du, haurren hezkuntzarako instalazio egoki eta modernoak bermatzeko “ingurune seguru batean”.
Usurbilgo Jeltzaleek hezkuntza publikoko sarean integratzearen eta hezkuntza zerbitzuak Udarregi ikastolaren inguruan batzearen alde egin du, Usurbilgo “hezkuntzaren kalitatea eta irisgarritasuna” hobetzeko neurri gisa.