Xabier Carbayeda herrikidea da gaurtik baba beltz txikiaren Usurbilgo kofradiako kide berria. Bilguneak urtero moduan, abuztuko azken ostegun honetan Saizar sagardotegian eginiko bazkariaren ostean izendatu dute. Unea, gainera, urtez urte berritzen segitzen duten ohitura honi buruzko nondik norakoak gogora ekartzeko ere baliatu nahi izan dute.
Kofradiako kideen izenean, Iñaki Almandozek gogorarazi moduan, duela ia mende erdi sortu zen aipatu bilgunea, "Bordatxoko aterpean. Torregarai eta Arteaga tartean zirela, hasi omen ziren halako bazkariak egiten. Gero etorri omen zen Felix Sarasola eta bere anaia Joxe Ramon. Haiek eman zieten bultzada handia eta pasa ginen Andazpera".
Felix zendutakoan, "sukaldari gabe geratu ginen eta Lertxunditarrek onartu ziguten". Haiek denak oroitu eta eskertu nahi izan dituzte txalo artean. "Gogoratu nahi nituzke kofradiako sortzaileak joandakoak, iaz hemen izan zirenak eta gaur ezin izan direnak etorri...", baita aipatu moduan, sagardotegikoak ere. "Eskerrak ematea Lertxundi familiari, Saizarko arduradunei kofradiari harrera egin eta bazkari ederra prestatu eta zerbitzatzen digutelako".
"Nahiko baztertua dugu"
Halere, bereziki, gaurko egunez omendu eta sustatu nahi duten baba txikia nabarmendu nahi izan du hitza hartutakoan. "Baba txikia da elikagai handi bat, urte askoan gose handia kendu duena Euskal Herrian", oroitarazi nahi izan du. Egun, "nahiko baztertua dugula", nabarmendu du Almandozek; "urtean zehar, ez dakit zenbat aldiz jaten dugun, uste dut gutxitan".
Hortik, kofradiak sorreratik duen egitekoaren garrantzia. "Joandakoek agindua eman ziguten ahal den neurrian jarraitzeko. Horregatik, eskatu nahi nizueke, ahal baduzue behintzat, ohitura honekin jarraitzea urtero-urtero ahal dugun bitartean", galdegin dute.
Eskertu dute gaurkoan, jende berria etorri izana, ongi etorria eman diete; "bakarrik falta zaigu gazte jende gehiago ikustea".
Albiste honi atxikitako bideoan duzue, baba beltz txikiaren kofradiak Saizar sagardotegian gaur eginiko bazkariaren osteko ekitaldia. Bertan, besteak beste, kofradekide berria izendatzeaz gain, hastapenetan sorturiko ereserkia abestu dute. Hemen duzue ereserki horrek dioena:
BABA BELTX TXIKIA
Gora baba beltx txikia,
andazpetarron gloria, bai!
Txiki izanarren, nor da gaur hemen
zu bezain handia?
Gora ditzagun zure dohainak:
koloria, armonia eta "tirrit eta tarrat"
zuk sortzen duzun sinfonia.
A zer nolako jakia
babatxo beltx txikia!
Platerkada bat, platerkada bi
bata bestearen atzetik,
atera hitzak, atera, Felix,
atera babak eltzetik!