Elikagai hau osagai duen bazkari ederra dastatu ostean, urteroko ohitura berritu dute, bilgunea bera biziberritzea ahalbidetzen duena; kofradekide berriaren izendapenaz ari gara. Ondoko irudiotan duzue, iaz iragarri eta aurten, 2024an iragarritakoa betetzera etorritako kide berria; Xabier Carbayeda, txirrindularitzan goi mailan aritutako herrikidea. Bera duzue baba beltz txikiaren kofradekide berria.
"Zorionak! Hemendik aurrera, gutako bat izango zara!", adierazi die kofradiaren izenean Iñaki Almandozek bazkalostean sagardotegian bertan eginiko ekitaldian. Erritu modukoa egin ohi dute kide berria izendatzeko. Gainerako kideei egin izan dieten moduan, txapela eta kapa beltza jantzi diote eta lurra lantzeko ezinbesteko tresna ezaguna izan dugun laiaren bidez "bedeinkatu", bazkaritara joandakoen txalo artean.
"Etxean ere jan baba txikia"
Eskerrak helarazi nahi izan dizkie Carbayedak sagardotegikoei, bazkaltiarrei. Gogoan izan du etxean bizilagun izan zutena. "Berak zioen bi platerka baba janez gero egunean, ez zela goserik izaten egun osoan, indarra ematen zuela. Berarekin oriotzen naiz eta ez daudenekin. Eskerrik asko denoi!", adierazi du herrikideak. Hurrengo edizioetako hitzordura etortzen jarraitzeko gonbita luzatzeaz gain, gaurko aipatu elikagaiaren gorazarrea urtean zehar gauzatzeko deia egin du. "Etxean ere jan baba txikia", dei egin du.
Ondoko argazkiotan duzue Xabier Carbayeda jada kofradekide direnekin batera, ereserkia abestuz amaitu duten izendapen ekitaldiaren ondotik, Saizar sagardotegi atarian ateratako talde argazkian.
Kide berria izendatuta, 2026an izendatuko dutena ere iragarri dute urtero legez. Bazkaritan bertan izan eta kofradiaren ereserkia abestera animatu den Joxe Mari Galarraga izango da urtebete barru, baba beltz txikiaren kofradiako kide berria.
