Helduenentzako zineforuma ostegunean Txirikordan

Zineforuma programatu dute ostegun honetarako, urriaren 29rako arratsaldeko 16:30etan, Ugartondoko belaunaldiarteko etxebizitza komunitarioan, Txirikordan alegia, bertako sotoan. Proiektatuko duten filma egun berean zehaztuko dute. Sarrera doakoa izango da.

Hilabete barru, hauteslekuetako bat
Txirikordako eremua dinamizatuko duen hitzorduetako bat hilabete barru izango da, azaroaren 29ko Espainiako Gorteak berritzeko hauteskundeak hain zuzen.

Gogoan izan, "Hauteskundeetarako Sekzio, Hauteskunde-Mahai eta Hauteslekuen zerrenda" argitaratu zuen Estatistikako Institutu Nazionalak hilaren 12ko Gipuzkoako Aldizkari Ofizialaren bidez.

Usurbili dagokionean, ohi bezala, udalerri honek zortzi hautesleku izango ditu azaroaren 29ko bozketa egunean. Norbera non dagoen erroldatua, horren arabera, segidan agertzen den taulako guneotako batera jo beharko du botoa ematera.

Adi, berrikuntzak daude, oraingo honetan. Izan ere, zortzi hautesleku horietatik bi Kalezarren kokatu izan dira aurreko deialdietan, haur eskolan hain zuzen. Oraingo honetan, ordea, birgaitze lanetan izango duten eraikina ez dute baliatuko azaroaren 29ko hauteskundeetan. Gipuzkoako Aldizkari Ofizialak gaur jakinarazitakoaren arabera, Ugartondon, Txirikorda belaunaldiarteko etxebizitza komunitarioan kokatuko dira aipatu Kalezarko bi hauteslekuak.

Gainerakoan, ohiko tokietan bozkatu ahalko da. Hiru hautesleku Udarregi ikastolako eraikin gorriko erdiko aretoan ezarriko dira eta beste hautesleku bana Santuenea Kultur Elkartearen egoitzan, Aginagako Herri Ikastetxean eta azkena, Zubieta Lanbide Eskolan.

Zubieta, dakizuenez, bi udalerrietako lurretan da; Usurbilgoan zein Donostiakoan. Aurreko deialdietan egin izan duten moduan, bi hautesleku izango ditu honenbestez; bat, Usurbil aldekoa, Zubieta Lanbide Eskolan, eta bestea, Donostia aldekoa, Zubietako Herri Ikastetxean.

Hautesleku horietan guztietan aurrez eginiko zozketa bidez erabakiko da zeintzuk egon beharko duten guneotan azaroaren 29an. Hilabete honen amaieran edota beranduenez jota, azaroa hasieran egingo du Udalak mahaikideon zozketa.