Igande honetan, martxoak 8, emakumeen eguna izateaz gain, Usurbilen alebin eta benjamin mailetako Gipuzkoako eskubaloi topaketarik handiena ospatuko da, Usurbil Kirol Elkartearen eta Gipuzkoako Eskubaloi Federazioaren gidaritzapean.
Guztira Gipuzkoa osoko 41 talde ibiliko dira jolasean Usurbilen, horietako 4 talde usurbildarrak, modu ludiko, ez-lehiakorrean (markagailuan golak apuntatu gabe) eta guztira 62 partidatxo labur ospatuko dira. Talde bakoitzak orokorrean 15 minutuko 3 partidatxo izango lituzke, aurkari desberdinen aurka kasu guztietan.
Klub hauetako taldeak etorriko dira:
- Hernani
- Saieko (Donostia)
- Bidasoa (Irun)
- Urola (Zumarraga/Urretxu)
- Sanlo (Elgoibar)
- Arrasate
- Mundarro (Astigarraga)
- Ereintza (Orereta)
- Orio Eragin (Orio)
- Aloña Mendi (Oñati)
- Zarautz
- Pulpo (Zumaia)
- Leizaran (Andoain)
- La Salle Legazpi
Aukera ezinhobea dute gure neska-mutilek beste taldeetako jokalariekin harremandu eta lagunak egiteko. Guztira 400 neska-mutil inguru Usurbildik pasatzea espero da, eta beste 800 bat ikusle (gurasoak, osaba-izebak, anaia-arrebak gehienbat). Mila lagunetik gora igande goiz eder batean, errespetua, parte-hartzea, laguntasuna, parekidetasuna eta beste hainbat balio sustatu ahal izateko.
Taberna, irekita
Ohikoa den moduan, sarrera-irteerak kanpoko zelaitik egingo dira (ez kiroldegiko sarrera nagusitik) eta taberna irekita egongo da, nahi duenak eztarria freskatu edota pintxo goxo bat dastatzeko.