Usurbil Kirol Elkarteak 2026-2027 denboraldiari hasiera ofiziala emango dio irailaren 5ean, Santueneko eskubaloi pistan egingo den talde aurkezpen ekitaldiarekin. Klubeko jokalari, entrenatzaile, familia, bazkide, babesle eta erakundeetako ordezkariak bilduko
dituen ospakizuna izango da.
Ekitaldia goizean hasiko da, eta bertan klubeko lehendakari Jon Loidik ongietorria emango die bertaratutakoei. Ondoren, hainbat ordezkari instituzionalen hitzaldiak izango dira, tartean Gipuzkoako Eskubaloi Federazioko lehendakaria Arantxa Arzak, Gipuzkoako Foru Aldundiko Kirol zuzendaria Roberto Ramajo eta Usurbilgo alkate Agurtzane Solaberrieta.
Aurkezpeneko une nagusia klubeko talde guztien desfilea izango da. Harrobiko gazteenetatik hasi eta maila nagusietako taldeetaraino, guztira hamabost talde aterako dira pistara beren entrenatzaileekin batera. Benjamin, alebin, infantil, kadete eta jubenil mailetako neska-mutilen taldeez gain, senior emakumezkoen taldea eta senior gizonezkoen taldeak ere aurkeztuko dira. Gogoan izan, beste urtebetez Lehen Nazional
mailan lehiatzen jarraituko dutela Usurbilgo senior mutilek.
Ekitaldian zehar aitortza berezia egingo zaie klubaren eguneroko jardunean ezinbestekoak diren entrenatzaile, delegatu, koordinatzaile eta boluntarioei. Era berean, eskerrak emango zaizkie Usurbil Kirol Elkartearen proiektua babesten duten erakunde eta babesleei, hala nola Gipuzkoako Eskubaloi Federazioari, Gipuzkoako Foru Aldundiari, Usurbilgo Udalari eta klubaren jarduera posible egiten duten enpresa laguntzaileei.
Jardunaldia talde argazki ofizialarekin amaituko da. Jokalari, entrenatzaile eta ordezkari guztiak pistaren erdian elkartuko dira 2026-2027 denboraldiari hasiera emango dion familia argazkia egiteko.
Usurbil Kirol Elkarteak herritarrak gonbidatu nahi ditu ekitaldira bertaratzera eta denboraldi berrian taldeei babesa ematera. Klubak azpimarratu du bere eguneroko jardunaren oinarrian konpromisoa, ahalegina, errespetua eta talde lana bezalako balioak daudela, eta aurkezpena horiek guztiak ospatzeko aukera paregabea izango dela.
Aupa Usurbil KE!