Usurbildarrak indartsu atera ziren kantxara, erritmo bizia ezarriz eta erasoan asmatuz. Hasierako minutuetan markagailuan aurrea hartzea lortu zuten, baina Ereintza Aguaplast pixkanaka partiduan sartzen joan zen, etxekoen erritmoa berdindu eta aldea murriztuz. Lehen zatia oso parekatua izan zen, eta bi taldeak berdinduta iritsi ziren atsedenaldira 13-13.
Bigarren zatiko hasiera, ordea, erabakigarria izan zen. Saizar Usurbil K.E.k ez zuen lehen zatiko intentsitate berarekin ekin, eta Ereintza Aguaplast hiru goleko aldearekin jarri zen jarraian. Usurbildarrek zailtasunak izan zituzten aurkariaren erritmoari eusteko, eta baloi-galera zein jaurtiketa-hutsegite batzuek kanpokoen abantaila handitzea ekarri zuten.
Hala ere, etxeko taldeak lanean jarraitu zuen partida amaitu arte. Erasoan, Jon Mikel Elexpek neurketa bikaina egin zuen, taldeari ekarpen handia eginez. Defentsan, berriz, Hama Dah Ould eta Gorka Arroyo nabarmendu ziren, egindako lan handiagatik eta erakutsitako sendotasunagatik.
Azken minutuetan Saizar Usurbil K.E. markagailuari buelta ematen saiatu zen, eta neurketak bizirik jarraitu zuen amaierara arte. Ahalegina egin arren, usurbildarrek ezin izan zuten Ereintza Aguaplasten abantaila gainditu, eta garaipena kanpokoentzat izan zen: 27-30.
Oiardoko giro bikainak eta zaleen babesak partida berezi egin zuten, baina oraingoan puntuek ihes egin zuten etxekoentzat. Taldeak, hala ere, lanean jarraituko du hurrengo jardunaldian garaipena lortzeko.
Loyolaren aurka, bi puntuak helburu
Saizar Usurbil K.E.k urriaren 24an, larunbatean, izango du hurrengo partida, Loyolaren aurka, Iruñean. Bi taldeak aurkari zuzenak dira, eta neurketak garrantzi berezia izango du sailkapenari begira.
Oiardoko porrotaren ondoren, helburua argia da: Iruñetik bi puntuekin itzultzea. Horretarako, taldeak zaleen babesa izango du, eta klubak autobusa jarriko du partida ikustera joan nahi dutenentzat.
Partida 18:00etan jokatuko da Iruñean, eta autobusa 15:15ean aterako da Oiardo Udal Kiroldegitik. Guztira, 30 plaza libre daude. Autobusa bete arte, zaleak doan joan ahal izango dira; bazkideek lehentasuna izango dute.
Taldeak zaleen babesa behar du erronka garrantzitsu honi aurre egiteko. Iruñean ikusiko dugu elkar!