Azoka, ikastaroa eta gabon giroko zenbait hitzordu antolatu ditu Santuenea Kultur Elkarteak urtea agurtzeko. Abenduaren 14tik urte amaiera arte hamabostaldi dinamikoa biziko dute auzoan. Hasteko, gabonetako azoka antolatu dute larunbaterako, auzoko frontoian, 16:00-20:00 artean.
Elkartasun txokoa
Haurrentzako tailerrak eskaini edota gabonetako zuhaitzaren argiak pizteko baliatuko duten artisautza eta jakien postuen artean, elkartasunerako txokoa egokituko dute. Izan ere, gogoan izango duzue, urria amaieran Valentzian izandako hondamendian kalteturikoentzako laguntza biltzen aritu ziren azaroa hasieran Santueneko frontoi ondoko lokalean. Elkartasunak gainezka egin zuen. "Herritarren aldetik erantzun bikaina lortu genuen eta bildutako ia guztia bidaltzea lortu dugu, arropa izan ezik (orain arte ez dute eskatu)". Ondorioz, gabonetako azoka horretan SOS Valentzia izeneko postua jarriko dute, "jendeak elkartasunez emandako beroki guztiekin, dirua biltzeko eta INTERAMPAIPORTA elkarteari emateko, eta horrela, Paiportako ikastetxeei diruz laguntzeko. Gure ustez, dohaintzan emandakoaren helburua ez zen hori, baina aukera hau baliatu nahiko genuke dirua bildu eta hara bidaltzeko behar duten eran erabil dezaten".
Postu hau tarteko, nahiz azokak izango dituen gainerako osagaiak kontuan izanda, larunbatean Santueneara joateko deia egin dute bertako kultur elkartetik. "Gabonetako azokaz gozatzera gonbidatzen zaitugu; abenduaren 14ko arratsaldean Santueneara eta SOS Valentzia postua bisitatzera. Zuzeneko musika eta sorpresa gehiago izango dira!!", aurreratu dute antolatzaileek.
Santueneko gabonetako ekintzak
Abenduak 14, larunbata
16:00-20:00 Gabonetako azoka eta eguberrietako argiak piztea.
Eskulanen eta artisau-produktuen salmenta eta haurrentzako tailerrak frontoian. Nuria Cullak girotuko du.
Abenduak 21, larunbata
18:30 San Tomas Eguna, txistorra banaketa.
Santuenea Kultur Elkarteko bazkideen artean otarren zozketa eta umeen artean txerritxoaren zozketa Santuenea 12an. DJ Gorka Mendik girotuko du.
Abenduak 23, 27, 30
11:00-13:00 Irristaketa ikastaroa frontoian eta eskubaloi pistan. Beharrezko materiala: kaskoa, babesgarriak (eskumutur eta ukalondoetarako eta betaurrekoak) eta patinak.
Prezioak: haur eta gaztetxoek 15 euro (Santuenea K.E.-ko bazkideek 5 euro) eta 25 euro 18 urtetik gorakoek (10 euro Santuenea K.E.-ko bazkideek).
Informazio gehiago jasotzeko eta izen-ematea: 621 095 644 /santueneake@gmail.com
Abenduak 24, asteartea
18:00 Olentzeroren eta Mari Domingiren etorrera.
Antolatzailea: Santuenea Kultur Elkartea.