Egunerokoan atez ateko bilketan jasotzen ez diren hainbat hondakin zati bertan uztea ahalbidetzen duen Usurbilgo Udalaren garbigune mugikorrari adi, gaurtik aurrera. Izan ere, zerbitzu honen orain arteko ibilbidean aldaketak txertatzea erabaki du Udalak. Orain arte bezala, aurrerantzean ere ostegunero egingo da toki aldaketa eta finkatuak zeuden toki horietan guztietan astebeteko egonaldia egingo du. Aldiz, ibilbide horretako geltokien hurrenkera aldatu du Udalak.
Zubietara
Azken astebete honetan, Aginagan izan dute garbigune mugikorra. Iazko udaberrian hasitako joan-etorrien zentzuari jarraiki, gaur Txokoaldera aldatuko zuten, handik Santueneara eta gero abiapuntura itzuli beharko luke, Zubietara hain zuzen.
Adi, ordea; Aginagatik zuzenean Zubietara lekuz aldatuko dute ostegun honetan, hilaren 11n. Bertan izango dute urtarrilaren 18ra arte. Gero hilaren 18tik 25era Txokoalden aurkituko duzue eta urtarrilaren 25etik otsailaren 1era Santuenean. Kalezar, Kaxkoa eta Aginaga izango ditu hurrengo geltokiak otsailaren 8an, 15ean eta 22an hurrenez hurren.
Urte berriko garbigune mugikorraren ibilbidearen noranzkoa beraz, honako hauxe izango da: Aginaga, Zubieta, Txokoalde, Santuenea, Kalezar eta Kaxkoa. Zerbitzu honen 2024ko egutegia argitaratu du Udalak. Hementxe duzue: garbigune mugikorra, 2024.
Gaikako bilketa hobetzeko
Gogoan izan, bereziki Garbigunera joan ezin dutenei zereginok erraztea du helburu eta San Marko Mankomunitateak hilean bitan ekartzen duen furgonetaren ordutegi murritza zabaltzea. Usurbilek egun duen %87ko gaikako bilketa hobetzen segitzen laguntzeko xedea du Garbigune mugikorrak.
Bilduko dituen hondakin motak
1. Margoak, bernizak, disolbatzaileak, kolak, fitosanitarioak (intsektizidak eta herbizidak), aerosolak eta horien ontziak (beteak, erdi-beteak zein hutsak).
- Bolumen txikiko plastiko gogorreko materialak (ontzi arinak ez direnak).
- Pilak.
- Tamaina txikiko txatarra (lapikoak, zartaginak, metalezko erretiluak, etab.).
- Material informatikoak.
- Bonbilla fluoreszenteak.
- Etxetresna, aparailu eta jostailu elektriko/elektroniko txikiak.
- Inprimagailuen tinta kartutxoak eta tonerrak.
- Material berrerabilgarriak (jostailuak, jolasak, gailu elektriko-elektronikoak...).
- Kafe kapsulak.
- Egur zati txikiak.
Erabilera irizpideak
• Hondakin mota bakoitzak bere ahoa du, sailkatuta jasotzeko.
- Garbigune mugikorretik kanpo ezin da materialik utzi.
- Utzi nahi den hondakinaren bolumenak ezin du dagokion ahoan ezer sartzea eragotzi: beraz, hondakina ahoa baino handiagoa bada, Atalluko garbigunera eraman behar da.
- Garbigunera eraman beharko da utzi nahi den hondakina material desberdinen nahasketaz osatuta badago.
Garbigunea
Honatx Atalluko Garbiguneko ordutegiari:
-Uztailaren 15era arte: astelehenetik ostiralera, 10:15-12:50 eta 16:00-18:50 artean zabalik; larunbatetan, 09:00-12:50 artean irekiko dute. Igande eta jai-egunetan itxita.
-Uztailaren 15etik irailaren 15era: astelehenetik ostiralera, 10:15-12:50 artean eta 16:00-18:20 artean. Larunbatetan, 09:00-12:50 artean. Igande eta jai-egunetan itxita.