San Estebango plaza erromeriari eskainitakoa izan da igande arratsalde honetan, abuztuaren 2an. Umeen Eguneko ospakizunak amaitu berritan ekin diote gauean barneratu arte luzaturiko trikiti doinuen erritmoaren araberako dantza saio luzeari.
Ohi den moduan, hasieran, dantzariak baino ikus-entzule gehiago egon arren, pixkanaka hasi dira erromeria zaletuak plaza hartzen. Talde txikiagoan aritu dira dantzan hasieran. Gerora, jende gehiago batu da, borobil ederra osatu dute.
Erromeria giroa gogotik pizten jardundakoak oholtzatik, Intxausti eta Larrañaga izan dira. Erritmo ezberdinetako kantekin bertso-afarira arteko tartea dantzan bizi izan dute San Estebango plazara joandakoek.
