Santixabelak amaituta, ospatu berri diren jaiak baloratzeko garaia dator orain. 2011. urte honetako herriko festek eman dutena aztertzeko bilera deitu du Jai Batzordeak, datorren ostegunerako, uztailaren 14rako. Hitzordua, arratsaldeko 19:00etan finkatu dute Artzabalgo aretoan. Deialdian nabarmentzen denez, "garrantzitsua iruditzen zaigu jaien balorazioa egitea ondo egindakoak mantendu eta hobetu beharrekoak bideratzeko". Jaien antolaketan parte hartu duten herriko elkarte eta taldeak gonbidatuak daude ekitaldira, eta haiei guztiei ebaluazio-orri bat helarazi zaie, aurtengo Santixabelak balora ditzaten. Haientzat da, hain zuzen, Jai Batzordearen hurrengo oharra ere: "Egokia litzateke, egun horretarako, ahal balitz, diru-kontuak zuritzeko agiriak ekartzea".