Asteotan iragarri moduan, gaur arratsaldetik aurrera Usurbilek Sexu Aholkularitza Gunea zabalik izango du. Gune berria, egun Gizarte Zerbitzuak dauden egoitzan kokatuko da. Urtarrilaren 10 honetatik aurrera, astearte arratsaldero zabalik izango da. Bi orduz, jendaurrean lanean jardungo du, Sexune elkarteko Elena Jimenez sexologoak. Zerbitzu berrira jo nahi duten herritarrek aldez aurretik hitzordua eskatu beharko dute.
Informazioa, formazioa, aholkularitza sexologikoa, gaian sakontzeko liburu gomendagarriak, gogoetarako baliabideak, orientazio sexuala, sexu-nortasuna, desiraren inguruko zalantzak, harremanetan zailtasunak... Gune berriak gai hauei lotuta eskainiko duen zerbitzua zabala da.
Hona hemen, Sexu Aholkularitza Gunearekin harremanetan jartzeko bideak:
Ordutegia: asteartero, 17:00-19:00 artean (urtarrilaren 10etik aurrera).
E-posta: sexuaholku@usurbil.net.
Telefono zenbakia: 697 919 516.
Helbidea: Kale Nagusia, 43 behea (Gizarte Zerbitzuetako egoitza).
Nori zuzendua: adin guztietako herritarrei.