Hiri hondakinen alorreko aholku batzorde bat eratzea onartu du Gipuzkoako Foru Aldundiko Diputatuen Kontseiluak. Helburu nagusi bat izango du bilgune honek; Gipuzkoako hiri hondakinak kudeatzea, BERRIA.info berri ematen ari denez. Bestalde, joan den astean, Aldundiak aurten alor honetara bideratuko duen diru-partidaren zenbatekoa zehaztu zuen. 547.592,65 euroko diru-laguntzak banatuko ditu hiri hondakinak gutxitu, berrerabili eta prebentzioa sustatzeko, 2012. urte honetan antolatuko diren ekimenentzat. Aldundiko gipuzkoa.net web orriak berri eman duenez, diru-laguntza hauek "Gipuzkoako Foru Aldundiko Ingurumeneko eta Lurralde Antolaketako Departamenduak banatuko ditu udalen eta mankomunitateen artean".
Diru-laguntza deialdiek Europako Batasunak ezarritako irizpideekin bat egiten dutela ohartarazi dute Aldunditik; prebentzioarekin lehenik, eta berrerabilpenarekin gero. Organikoa ongarri bihurtzea sustatu nahi du Aldundiak, diru-laguntza deialdi honen bidez, "hartara, konpostatzeko proiektuak lehentasunezkoak izango dira, zirkuitutik hiri hondakin kopuru handia ateratzea ahalbidetzen baitute. Horrez gain, ongarri bihurtu ondoren, baliabide modura erabiltzeko aukera ematen dute gai organikoek. Konpostatzea, ingurumenarentzat mesedegarri izateaz gain, ekonomikoki merkeagoa da udalentzat eta mankomunitateentzat".