Duela hilabete herrian burutu zen "Ontziratu zaitez. Dendatik sukaldera, usain eta hondakinik gabe!" kanpainaren baitan, herritarren artean haragia edo arraina erosi eta etxera eramateko 1.000 ontzi berrerabilgarri banatu ziren. Egitasmoa, Usurbilgo Udalak, Hurbilago Elkarteak, Usurbil Zero Zaborrek, herriko zortzi saltokik eta Kutxa Ekoguneak bultzatu zuten. Eragileek jakitera eman dutenez, ontzi berrerabilgarriok banatu bakarrik ez, erabili ere erabili dituzte herritarrek. 1.200 erosketa baino gehiago egin dituzte tupper berdeokin, ekimenarekin bat egin duten herriko zortzi arrandegi eta harategietan. Urtarrilaren 28tik otsailaren 4ra luzatu zen kanpainaren baitan gogorarazi zenez, ontzi berrerabilgarriekin erosketak egiten zituztenek 30 euroko erosketa balea irabaz zezaketen. Herriko zortzi arrandegi eta harategietan joan den hilabeteari, otsailari dagokion zozketa egin dute jada, eta ondoko irudikoak dira egitasmo berri honetako lehen sarituak: