Andatza Mendizale Elkartekoek Azpeitia eta Usurbil lotuko dituen ibilaldia antolatu dute, igande honetarako, apirilaren 15erako. Web orri bidez zehaztu dutenez, "Azpeitiatik abiatuta Arauntza igaro eta Sañu mendia igo ondoren, Munomendi eta Artzaigañako zelaietako bidezidorretatik Aizarnatik datorren errepideraino joango gara. Tartean, Sebastian Lizaso bertsolariaren oroigarriaren albotik pasako gara. Etumetabea, Etumetazar eta Etumetabenta baserriak zeharkatu ondoren, Indo mendiaren albotik Urgumeko erreka pasa eta Iturriotzera iritsiko gara. Iturriotzeko aterpean otordua prestatuko da, ibilbidearen hurrengo zatiari indar berriturik ekiteko. Andazarratera eramango gaituen bidezidorretik, Bulanomendi eta Zarateko benta aldera bideratuko da ibilaldia. Ziortzako langatik sartuko gara Usurbilgo udalerrian, Andatzako maldei ekin aurretik. Azkeneko maldak igaro eta gainbeherako bidea hartuko dugu Puelaberritik Ermotegira jaisteko. Zorrotzako zubitik Usurbilgo erdigunera iritsiko gara ibilbideari amaiera emanaz".