Bizkaia aldera, Enkarterrietara mendi irteera antolatu du Andatza Mendizale Elkarteak, igande honetarako, irailaren 2rako. Biltzeko hitzordua, goizeko 6:30etan finkatu dute Oiardo kiroldegi parean. Autobusez egingo dute joan etorria. Izen ematea itxita du antolakuntzak. Ordunte mendilerro ingurura joko dute sei egun barru. "Zeharkaldia, Karrantzako Lanzas Agudasetik irtengo da Balmasedako Pandozales auzoan bukatzeko, zehazkiago, Balmasedatik 1,5km-tara dagoen parke batean amaituko dugu", adierazi dute antolatzaileek, web orri bidez. Irteerari buruzko informazio zabala hain zuzen, andatzamendizale.info helbidean jaso daiteke.