Martxoaren 14tik 24ra ospatuko da, jada "adinez nagusi" izatera heldu den Korrika 18. Bi urtean behin burutzen den ekimena, ostiralean aurkeztu zuen AEK-k Bilbon egin zuen ekitaldian. Edizio honetako aldarria ere zein izango den aurreratu dute jada; "Eman euskara elkarri". Lema hau hautatu izanaren zergatia, antolatzaileek argitua dute jada martxan den Korrikaren web orrian: "euskarak euskal herritarrok elkarrekin bizitzeko hizkuntza izan behar duelako. Elkarri hitz egiteko hizkuntza. Elkar entzuteko eta ulertzeko". Horregatik, oraingoan, euskalduntzen eta alfabetatzen ari diren ikasle guztiak omendu nahi dituzte, "bere ahaleginarekin euskaraz bizi ahal izatea ahalbidetzen, eta beraz, elkarbizitzarako aukerak sortzen ari direlako".
Hauxe momentuz, antolatzaileek Korrika 18ren inguruan aurreratu dutena. Zehaztasun gehiago, hitzordua gerturatu ahala emango dituzte; besteak beste, zabalik duten korrika.org web orrialdearen bidez. Aipatu atarian adierazten ari diren bezala, geroz eta gutxiago falta da, Euskal Herria alderik alde zeharkatuko duen euskararen aldeko lasterketari ekiteko; 122 egun hain zuzen.