Gaur arratsaldeko 18:00etarako, osoko ohiko bilkura deitua dago Usurbilgo Udaleko udalbatza aretoan. Azaroaren 27 hau asteartea baitugu, hilabete honetako azkena hain zuzen. Gaurko saiorako osatu duten zerrendan, nabarmentzekorik baldin bada, mozioen atala da. Alor eta gai desberdinei loturiko bost testu aurkeztu, eztabaidatu eta bozkatuko dituzte udal ordezkariek.
Mozioetako baten berri, atzo eman genizuen web orrialde honetan. Joan den igandeko, azaroaren 25eko Emakumeen Aurkako Indarkeria Ezabatzeko Nazioarteko Egunaren harira, adierazpen instituzionala onartu asmo du gaur udalbatzak. Honez gain ordea, aipatu moduan, beste lau mozio aztertuko dira astearte honetako osoko ohiko bilkuran.
Batetik, Usurbilgo Elkartasun Taldeak Palestinan bizitzen ari diren egoerari lotuta, erregistratu duten testua bozkatuko dute udal ordezkariek. Bizi dugun krisialdi ekonomikoari lotuta, han eta hemen, etengabe gertatzen ari diren etxegabetzeen inguruko beste testu bat ere bada gaurkoan. Ingurumen alorreko beste bat baita; kutsadura elektromagnetikoari buruzkoa. Eta azkenik, joan den astean iragarri genuen moduan, Usurbilgo PSE-EE taldeak aurkezturiko mozioa, Kalezarren eraikitzekoak ziren zahar egoitza egitasmoarekin aurrera jarraitzea eskatzen duena.
Mozio guztiok, beste gai batzuekin batera, zerrenda honetan agertzen diren ordenean aztertu eta bozkatuko ditu udalbatzak, gaur arratsaldeko 18:00etatik aurrera:
1-Aurreko bilkurako akten onespena:
2012/10/16ko bilkurako akta.
2012/10/30eko bilkurako akta.
2-2012ko aurrekontuaren 5. kreditu aldaketa onartzea.
3-Alkatetzako dekretu hauen berri ematea: 2012ko urriaren 31tik azaroaren 22ra (2012/0953-2012/1011).
4-Galderak, eskaerak eta mozioak:
4.1. Kutsadura elektromagnetikoari buruzko mozioa.
4.2. Azaroaren 25eko adierazpen instituzionala: Emakumeen Aurkako Indarkeria Ezabatzeko Nazioarteko Eguna.
4.3. Zaharren egoitzari buruzko mozioa.
4.4. Etxegabetzeen egoera larriaren aurrean aurkeztutako mozioa.
4.5. Usurbilgo Elkartasun Taldeak aurkeztutako mozioa.