Korrika 18rako prestaketa lanak abian dira Usurbilen. Korrika Batzordearen lehen bilera finkatu dute jada; abenduaren 11rako, datorren astearterako, iluntzeko 20:00etan Etumeta AEK euskaltegian. "Bertan Korrika 18ren nondik norakoak eta gure herrian egingo direnak ezagutzeko aukera izango duzu, eta horrela nahi izanez gero, herrirako bestelako ekitaldiak proposatzekoa ere bai. Horrez gain, herrian egin beharreko lanak zerrendatu eta banatuko ditugu. Jakin badakigu denok ez ditugula aukera berdinak gure ekarpenak egiteko, eta horregatik, hain zuzen ere, konpromisorik gabe etor zaitezen eskatzen dizugu. Bertan entzundakoaren arabera erabakiko duzu, gero, zeure ekarpena zein izan daitekeen; eta, inolako aukerarik izango ez bazenu ere, Korrika geure herrian izango dela ezagutu eta zabal dezazun da gure nahia", adierazi dute deitzaileek.
Parte hartzera deitzen dute. "Korrikak hasiera-hasieratik aldarrikatu duen legez, Korrikaren helburuak bete daitezen guztion ekarpena eta ahalegina dira beharrezko. Denon parte hartzeaz lortuko dugu Euskal Herri euskalduna eta guztion esku eta oinei esker eraman ahal izango dugu euskararen lekukoa Andoaindik Baionaraino. Ahalegin horretan zeure laguntza estimagarria izango dugulakoan, besterik gabe, hurrengo asteartera arte", agurtzen dira.
2013ko martxoaren 14an abiatuko da Korrika 18 Andoiainen. Hamar egun beranduago helduko da helmugara, Baionara.