Albiste behar ez zuena, albiste dugu beste behin, oraingoan ordea ez delako ezer gertatu. Mikel Laboa plaza aurreko errotondan, aurtegoan estalpe baten babesean Udalak kokatu duen Olentzero berriak ez du erasorik jasan, ez eguberrietan, ezta urtezaharretan ere. Txikizio nabarmenik gabe behintzat, zegoen lekuan eta oso osorik jarraitzen du, gabonen azken txanpa honetan. Eta hala jarrai dezala, aurreko bi urteetan erasotua izan baitzen. Ondorioz, aurtengorako erabiltezin geratu ostean, oraingoan irudi berri bat jarri behar izan du Udalak.
Eguberri aurreko azken NOAUA! aldizkarian "ika-mika" atalean udal iturriek aditzera eman zutenez, "geurea den Olentzeroren irudia zapuzten saiatu izan dira azken bi urteotan. Euskal mitologiaren ikurra da Olentzero baina batzuentzat, itxuraz, dibertigarriagoa da herriko errotondako irudia hankaz gora botatzea. Behinola Olentzerori burua leherrarazi zioten; eta urtebetera (bururik gabe Usurbildik oinez ibiliko zenaren beldurrez, beharbada) guztiz txikitu zuten. Konponketa lanak besteon eskura utzi zituzten, noski. Ikastolako oporrak hartu berri dituzten haurrek, aurten, Olentzero desberdin bat aurkituko dute betiko errotondan. Azken bi urte hauetan erasoak jasan dituen irudia konpontzea ezinezkoa izan da".
Horregatik, "aurten Olentzero xumeago batek egingo digu ongi-etorria usurbildarroi eta gure herrira datozen bisitariei", hala dio Udalak NOAUA!ra igorri zuen idatziak. "Geure buruari harrika ibiltzeak dakartzan ondorioak dira, zalantzarik gabe. Olentzerok burua galdu zuen behin; usurbildarrok gure ohiturei tinko eusten jarrai dezagun, inondik inora zentzurik galdu gabe. Ez da zilegi herriak herriari ikatza oparitzea. Olentzerori burua gal ez dakion eskatzen dugu; eta urtean zehar eskatu dioguna bete dezala opa dugu. Datorren urterako gure etxeetara osasuna eta askatasuna ekar diezagula opari moduan. Eta era berean, geurea dena errespetuz zaintzen eta belaunaldi berriei gure kulturaren ondarea erakusten jarrai dezagula".