"Erradiazio elektromagnetikoa eta osasuna" izeneko solasaldia antolatu du Usurbilgo Udalak, datorren astearterako, hilaren 15erako, 19:00etan Potxoenean. Erradiazio elektromagnetikoa zer den, osasunarentzat kaltegarria ote den, edota aditu desberdinek gai honen inguruan diotenaren berri emango du ingurumen alorreko zinegotzi eta sare informatikoen arloan EHUko irakasle den Jose Maria Rivadeneyrak. Usurbilgo Udaleko udalbatzak gai honi loturiko mozioa onartu zuen aho batez, joan den azaroaren 27an burutu zen osoko ohiko bilkuran.
Ke eta usain txarren inguruko batzarra etzi
Aipaturikoa ez da egunotarako ingurumen alorrari loturik egin den deialdi bakarra. Etzirako, urtarrilaren 11rako herri batzarra deitu du Itayak, 19:00etan Potxoenean. Udalerrian ke eta usain txarrekin dagoen arazoaren aurrean zer egin daitekeen aztertu nahi da ostiralean. Gazte asanbladatik berri eman dutenez, lan talde bat ere osatu asmo dute. Hilabeteko lehen ostirala izanik, urtarrilaren 4an Mikel Laboa plazan kutsaduraren aurka, "UCINek gure osasunarekin jolasten du" lemapean burutu zen elkarretaratzean, etziko herri batzarrean parte hartzeko gonbita luzatu zuen Itayak.