Aste hasieran aurreratu genizuen; 2013ko Inauteri Festak berrikuntzak zekartzala. Otsailaren 9an ospatuko den mozorro festarako gaia zehaztua dago jada; musika dugu, aurtengo jantziak prestatzeko aitzakia. Aurreko asteetan berri eman dizuegunez bestalde, Inauteri Festako egitarauan ere berrikuntzarik izango da. Tartean, erraldoiekin egin nahi den kalejira bat. Prestaketa lanak igandean abiatu zituzten, Usurbilgo Gaztetxean.
Beste nobedade baten berri orain. Inauteri Festa egunez ospatu nahi da aurten. Eta honenbestez, egitarauan zenbait aldaketa izango dira. Otorduarena tartean. Aurreko urteetan, afaria ospatzen zen Inauteri Festa egunean. Aurtengoan ordea, bazkaria antolatu da Olarrondo jatetxean. Sarrerak urtarrilaren 22an jarriko dira salgai. 18 euroren truke, Txiribogan, Irratin eta NOAUA!ko egoitzan eskuratu ahal izango dira.