Martxoan ospatuko den Korrika 18ren harira, batzorde bat osatua dago Usurbilen. Datozen hileotan euskararen aldeko lasterketa dela eta bideratu asmo dituzten egitasmoak lantzen ari dira bertan. Honen haritik, Lasarte-Oriako eta Usurbilgo Korrika arduradun Iker Urmeneta elkarrizketatu du NOAUA!-k. Biharko Korrika Omenaldiaz mintzatu da aldizkari honekin. Bere esanetan, "Ikasleak kontzientziatu nahi ditugu, beraiek direla aurtengo protagonistak eta beraiek hartu behar dutela papera. Omenaldiaren eguna horretara dator". Euskal Herriko txoko desberdinetatik etorritako ikasleak espero dira bihar Usurbilen. Baita noski, beste hainbat euskaltzale ere. Biharko jaialdiaz, eta Korrika Batzordea lantzen ari den egitasmoez hitz egin du Urmenetak, urtarrilaren 25 honetako NOAUA! aldizkariko elkarrizketan. Hona hemen galde erantzun guztiak, bere osotasunean:
Euskara ikasten ari direnen omenez, larunbateko Korrikaren jaialdia
Korrika badator martxoan. Ekimenaren 18. edizioan euskara ikasten ari direnak omendu nahi dituzte. Lehenengo omenaldia hain zuzen, larunbat honetan jasoko dute Usurbilen antolatu den egun osoko jaialdian. Txotx festa izango da frontoi inguruan, eta egun osoz. Jaialdiari buruzko eta martxoko Korrika 18 prestatzeko herrian osatu berri den batzordearen inguruko zehaztasun gehiago, Lasarte eta Usurbilgo Korrikako arduradun Iker Urmenetak dakartza lerrootan.
Korrika Batzordea zer helbururekin osatu da?
Korrika bera eta Korrikaren aurretik egin beharreko lana koordinatzeko osatu da. Helburu nagusia, kasu honetan Usurbil mailan egin beharreko ekintzak guztion artean auzolanean eta elkarlanean burutzea da. Horregatik, zenbat eta jende edo eragile gehienek parte hartu, gauza gehiago egiteko aukera egongo da. Bilguneak herriko eragileek bertan parte hartu eta proposamenak egiteko aukera ematen du. Guztion artean, Korrika ahalik eta indartsuena egiteko.
Bi bilera egin dituzue. Korrika heldu artean, zer egingo da herrian?
Lehenengo bileran gehienbat, AEKren partetik zeuden proposamenak bota ziren. Eta bilerara azaldu ziren eragileek ere bota zituzten euren proposamenak. Printzipioz, Korrika Kultural barnean Usurbil mailan omenaldia dagoenez larunbatean, ez genuen planteatzen ekitaldi nagusirik egitea Korrika bitarte. Baina bai badaudela ekintza batzuk zehaztu zirenak. Bat, ginkanarena. Euskal Herri mailako ekimen bat izango da. Eskualdeka, aurre kanporaketak egitea planteatzen da. Gero Gipuzkoa mailan herrialdeko kanporaketa izango litzateke, eta finala, Baionan martxoaren 24an, Korrika bukatzen den egunean.
Aurtengo nobedadeetako bat da ginkana?
Denetariko probak egongo dira. Kirol probak, bertsoak egiteko probak… Gune bakoitzean proba bat egin beharko da. Frogak gaindituta pista izango lukete hurrengo gunera joateko. Asmoa gizon eta emakumeen zortziko taldeak osatzea da. Printzipioz 16 urtetik gorakoentzako frogak izango lirateke eta asmoa da gehienbat, Korrikaren aurtengo omenduak euskara ikasten ari direnak izanik, ikasleak parte hartzea. Baina baita ere herrira irekitzea eta usurbildarrak ere parte hartzeko aukera izatea.
Talde hau nola osatzeko asmoa duzue?
Informazioa pasako dugu, urtarrilaren 28ra arte taldeak apuntatzeko epea izango da. Euskaltegian eta tabernetan jarriko ditugu zerrendak. Zortziko taldeak izango dira. Taldeak osatu, apuntatu eta telefono bat eman dezatela. Otsailean aurre kanporaketak egingo dira. Martxoko lehen eta bigarren asteburu artean, herrialde mailako final aurrekoa egingo litzateke eta finala martxoaren 24an. Talde bakoitzeko 40 euro ordaindu beharko dira, 5 euro pertsonako eta kamiseta bat izango du opari. Eta gero irabazleak ere sari bat izango luke. Eta finalera iritsiz gero Baionan, sari potoloagoa izango litzateke.
Ginkanaren helburua Korrika laguntzea izango da. Ekarpenak egiteko, herritarrek ze beste aukera izango dituzte?
Korrika Laguntzailea. 12 euro ordainduta pin bat jasotzen da. Bere datuak jasota, astebeteko epean etxera txartel bat iritsiko litzaioke, eta txartel horren bidez izango luke aukera zenbait dendetan, deskontuak edo beherapenak jasotzeko. Katalogo bat atera dute, katalogo horiek ikusgai jarri ditugu. Katalogo horietan agertzen diren dendetan beherapenak jasotzeko aukera izango lukete. Korrika laguntzaile egiteko aukera dugu Usurbilen, Aitzagan, Txirristran eta euskaltegian. Herritarrak horren bidez ere Korrika laguntzera animatzen ditugu. Badakigu Korrika euskararen aldeko lasterketa bat dela, baina horren atzean ere diru bilketa bat egiteko asmoa dago. Gaur egun badakigu krisiaren eraginez jendeak diru kontuetan ez dabilela ondo, baina guztion laguntza eskatzen dugu, AEK-k ere laguntza hori behar baitu.
Beste aukera, kilometroa, kilometro erdia… erostea. Lan hau nola bideratu asmo duzue?
Hasiera batean Korrika Laguntzailearen kanpaina hori martxan dago, norbanakoek aukera izateko. Aurrerago Korrika Lagun egiteko aukera egongo da. Korrika Lagunekin, dendek edo elkarteek aukera izango dute nahi duten ekarpen ekonomikoa egiteko. Eta gero jada, kilometroak erosteko aukera izango lukete, norbanako, elkarte, dena delako enpresek… Hori jada, aurrerago egingo genukeen lan bat izango da. Komentatu, mus txapelketa bat antolatzeko asmoa dugula Gipuzkoa mailan. Usurbilen ere hori egiteko asmoa dugula. Datak oraindik zehazteke daude. Asmoa, kanporaketak herrian egin eta finala sariekin, Gipuzkoa mailakoa izatea da.
Herri eragileek edo herritarrek zer ekarpen egin dezakete Korrika Batzordean? Nahi duenak euskaltegira etorri eta gurekin harremanetan jarri dadila. Ez dago inolako arazorik euren proposamenak aurrera ateratzeko. Gu pozik, beraien parte hartzearekin.
“Ikasleak kontzientziatu nahi ditugu, beraiek direla aurtengo protagonistak”
Ikasleak omenduko dituen larunbateko jaialdiaren eta Korrikaren atarian, zer giro bizi duzue euskaltegian?
Ikasleak kontzientziatu nahi ditugu, beraiek direla aurtengo protagonistak eta beraiek hartu behar dutela papera. Omenaldiaren egun hori horretara dator. Asmoa zen ere, jai baten bidez beraiek ere omentzea. Eta jai horretan ere, euskaraz hitz egiteko, beste herritarrekin hartu emanak izateko eta euskaraz bizi daitekeela frogatzeko, aukera izatea.
Zer izango dugu larunbatean Usurbilen?
Nazio mailako ekitaldi bat izango da. Euskal Herri osoko ikasleak, jende oro etorriko da. Printzipioz egitarauari dagokionez, kale animazioarekin hasiko da eguna 11:00ak aldera. 13:00etan bertsolariak eta txotx irekiera izango dugu. Sagardotegi festa moduko bat antolatu da frontoi eta Dema plaza inguruan. Gero jada 14:00etan bazkaria izango da, Bizkaiko EHNEkoek prestatuko dute. 16:30etan, garrantzitsuena, ekitaldia izango da eta bertan omenduko dira euskara ikasten ari direnak. 18:00etan erromeria izango dugu, dantzatzeko. 19:00etan kantu jira izango dugu Usurbilgo Kantu Taldearen eskutik. Eta gero 21:00etan Esne Beltzak kontzertua eskainiko du., bera izan delako Korrikaren kanta egin duena.
Zer aurreikuspen dituzue larunbaterako?
Jendea Euskal Herriko herrialde guztietatik etorriko dela aurreikusten da. Herritarrak parte hartzera animatzen ditugu. Eguneko jai bat izango da. Gauerdira arte luzatzea aurreikusten da. Ahalik eta jende gehiena bildu nahi dugu; haurrak, gazteak, helduak… eta bereziki ikasleak. Guztien artean euskararen jai bat izatea nahi da Usurbilen.
Informazio gehiago: korrika.org edo 607 609 379 (Etumeta AEK euskaltegia).