"Munalurrarako sarbidea hobetzea eskatzen du PSE-EEk" izenburupean, udal talde sozialistak NOAUA!ra helarazitako prentsa oharraren berri eman genizuen azaroaren 8an. Bertan, udaletxean Munalurrarako sartu irteerak hobetzea eskatu zutela aipatzen zuen Usurbilgo PSE-EEk. Neurriak hartzea eskatzen zioten gobernu taldeari. Munalurrak hiru irteera, baina sarbide bakarra zuela gogorarazten zuten. Horregatik, besteak beste, "kale baten noranzkoa" aldatzea proposatzen zuten. Neurriokin, PSE-EEren ustez, "Munalurran dabiltzan ibilgailuen sartu irteerak hobetu eta sarbide zuzena izango lukete, auzunera itzultzeko Usurbilgo erdigunera joan beharrik izan gabe".
Gaur PSE-EEtik NOAUA!ra helarazi duten prentsa oharrak dioenez, sozialistek eginiko proposamenak aintzakotzat hartu ditu Udalak. Neurriok, bide segurtasunerako beharrezkoak direla berresten du sozialisten taldeko bozeramaile Ricardo Crespok. "Munalurrako sarbide eta irteeratan hobekuntza izango den moduan, auzoko segurtasuna hobetuko da", adierazi du. Gai honi heltzeko unea orain dela azpimarratzen du, "Agerreazpiko urbanizazio lanak amaitu eta auzora bizilagun gehiago etortzearekin batera egoera okertuko baita".
PSE-EEren ekimen hau, auzoko hamarnaka bizilagunen sinadurek babestu eta guztiek arazo hau ahal bezain azkar konpontzea eskatzen dutela gogorarazten du Crespok.