Otsailak 4 ditu gaur, Santa Ageda bezpera dugu astelehen honetan. Datozen orduotan, herritar eta ikasleak makilak eskuetan, egoki jantzita, koplak abesten kalean ikusiko ditugu. Udarregi Ikastolako ikasleak kantatzera irteten lehenak izango dira. Bazkalostean, 14:45ak aldera. Lehen Hezkuntzakoak ikastolatik Kalezar aldera joko dute eta handik frontoira. 16:00etarako pilotalekuan, Haur Hezkuntzako ikasleekin bilduko dira koplak kantatzeko. Ikastolatik berri eman dutenez, tarte horretan, DBHkoak auzoetan abesten arituko dira.
Ikastolakoek euren erronda amaitu ostean, lekukoa Kantu Taldekoek eta Bota Punttubakoek hartuko dute iluntzeko 18:30etan, Mikel Laboa plazan. Herritarrei, ekitaldirako egoki jantzita eta makila eskuetan agertzera deitzen diete. Ordu eta leku horretatik abiatuta, Santa Ageda bezpera honetako kantu-jira berezia ospatuko dute. Ordu berean baita, baina Zubietan ere kantuan hasiko dira. Zubieta Lantzenek otsailaren 4 honetarako koplak zaharrak abesteko hitzordua deitu baitu; aipatu moduan 18:30etan, Kaxkapen.
Laburbilduz, hauek dira Santa Ageda bezpera honetan abestera irteteko antolatu diren hitzorduak:
14:45-16:30 Udarregi Ikastolako ikasleen kalejira. Amaiera, frontoian.
18:30 Kantu Taldeak eta Bota Punttubak antolatutako kalejira, Mikel Laboa plazatik abiatuta.
18:30 Zubieta Lantzenek antolatuta, kantu saioa Kaxkapetik abiatuta.