Usurbilgo bizikleta planean sakondu eta Kaxkoko bidegorri sarea definitzeko bilera antolatu du Usurbilgo Udalak, etzirako, otsailaren 7rako, 19:00etan Potxoenean. Udalerrian bizikleta sustatu nahi duen herritar orori zuzendua dago astebete barrurako finkatua dagoen hitzordua. Bileran, argibideak ematen arituko dira; Ibon Goikoetxea Usurbilgo Udaleko ingurumen teknikaria eta Ander Irazusta, Biziker enpresako mugikortasun aholkularia.
Udalak landua duen herriko bidegorri sarearen plan zuzentzailea baliatuko dute, bilerako abiapuntu gisa. Hauxe, otsailaren 7ko ekitaldiari begira, Usurbilgo Udaletik helarazi duten oharra:
USURBILGO BIZIKLETA PLANA
KAXKOKO BIDEGORRI SAREA
Jakina da, leku batetik bestera joateko, ibilgailurik eraginkorrena bizikleta dela. Horretarako ordea, lehenik eta behin bizikletari lekua egin behar zaio herriko kaleetan eta horrek hausnarketa eta plangintza bat eskatzen du.
Usurbilgo Udalak landutako herriko bidegorri sarearen plan zuzentzailetik abiatuta, Usurbilgo bizikleta planean sakondu nahi da eta zehazki kaxkoko bidegorri sarea definitu. Horretarako, lehen bilera deialdia otsailaren 7an, ostegunez, arratsaldeko 19.00 tan izango da, Potxoenean.
Bilera hauek, Usurbilen bizikleta sustatu nahi duen orori zuzenduta daude eta bertan izango da Ibon Goikoetxea, Udal ingurumen teknikaria eta Ander Irazusta, Biziker enpresako mugikortasun aholkularia.