Usurbilgo Udalak, wi-fi sarea kendu du Sutegi udal liburutegitik. Aurrerantzean, liburutegi orokorreko mahai bakoitzak Internet sarera konektatzeko kablea izango du. Osasunerako kaltegarri suerta daitezkeelakoan, hartu du Udalak erabaki hau. Antzeko pausoak eman asmo dituzte baita, Udalarenak diren gainerako eraikinetan.
Azaroaren 27an udalbatzak, erradiazio elektromagnetikoen inguruan aho batez onartu zuen mozioaren harira dator, Sutegitik wi-fi sarea kentzeko erabakia. Modu honetan, Europako Kontseiluko Legebiltzarkideen Batzarrak onartua duen ebazpenarekin bat egin zuen Udalak. Udal ordezkari guztien babesa jaso zuen testuak zioenez gainera, "Usurbilgo Udal Batzarra, aipaturiko ebazpenean jasotzen diren gomendioak Usurbilgo eraikin publikoetan ezartzearen alde agertzen da, Gipuzkoako Batzar Nagusiek bere 2012-6-22 eguneko 72/2012 ebazpenean eskatutakoari kasu eginez".
Neurriak hartzeko beharra
Mozioak oso modu argian jasotzen du, Europako Kontseiluak onarturiko ebazpenak egiten duen jakinarazpena: "Zuhurtzia Printzipioa erabili behar da balorazio zientifikoak ezin duenean zehazki ezarri zein den benetako arriskua. Populazioaren esposizioa gero eta handiagoa dela ikusita, eta bereziki kalteberak diren gazteak eta umeak, eragindako giza-kostuak eta kostu ekonomikoak ikaragarriak izan daitezke garaiz egindako oharpenei kasu egiten ez bazaie".
Horregatik, Europatik alor honetan neurriak hartzeko deia egiten dute. "Eremu elektromagnetikoekiko esposizioa gutxitzeko zentzuzko neurriak hartzea, bereziki telefono mugikorrek igorritakoak, eta partikularki umeen eta gazteen esposizioa gutxitzea, hauen kasuan buruko tumoreak garatzeko arrisku handiagoa dela dirudi eta". Azaroa amaieran, udalbatzak aho batez onartu zuen testuak, Europatik proposaturiko neurrietako batzuk jasotzen ditu:
-"Barruan mikrouhinen esposiziorako epe luzeko mugak ezartzea, Zuhurtzia Printzipioa jarraituz, 0,6 Voltio/metro gainditu gabekoak".
-"Lehentasuna eman, bereziki umeentzako eta orokorrean eskoletan eta geletan, kable bidezko Interneterako sarbideei, eta zorrotz arautu ikasleen telefonoen erabilera eskolan bertan".
-"Hirigintzako arauak ezarri etxebizitzen eta tentsio altuko lineen eta beste instalazio elektrikoen arteko distantzia segurua behartzeko".
Eskuorriak
Gai honi buruzko gomendio eta informazioarekin batera, Udalak eskuorriak banatu berri ditu. Eskuratu ez duenak, usurbil.net atarira jo dezake.