Egun osoko egitaraua antolatu du Korrika Batzordeak, bihar Usurbila helduko den Korrika dela eta. Girotzen hasteko, Udarregi Ikastolakoen eskutik atzo ospatu zen Korrika Txikia. Gaur gaueko 22:00etatik aurrera pin pon txapelketa antolatu dute frontoian. Parte hartu asmo duzuenok, izen emateko pilotalekura gerturatu beharko duzue ordu erdi lehenago, 21:30etan.
Aipatu moduan, bihar goizetik hasita, egun osoz Korrikaren aldeko ekitaldiak izango ditugu. Hasteko, adi etxeko txikienak. Nekatu arteraino lasterka aritzeko aukera izango duzue eta. 11:00etatik aurrera buruhandiak irtengo dira Kaxkora. Ordu berean ekingo zaio, "Txokotan palaz" ekimenari ere frontoian. Antolatzaileek pala txapelketa honetan parte hartzera animatu nahi dituzte adin guztietako herritarrak; haur, gazte nahiz helduak. Etxetik norberak bere pala eramatea eskatzen da. Hortik aurrera, momentuan bertan izena ematen dutenekin taldeak sortu eta palan ibiltzeko aukera izango da bihar.
Bertso-afarirako txartelak salgai
Goiz bazkaldu beharko da bihar, Korrika iristerako garaiz prest egoteko. Gogoan izan, 15:44 aldera sartuko da Aginagatik. Kaxkoan 16:30ak alderako espero da euskararen aldeko lasterketa. Baina ohi bezala, zertxobait aurreratu edo atzeratu daiteke.
Arratsalde eta iluntze parterako beste bi ekitaldi antolatu ditu Korrika Batzordeak. Hasteko, erromeria 18:00etatik aurrera frontoian. Eta bertso-afaria gaueko 21:00etatik aurrera Agerialdeko jangelan. Hiru bertsolari gazteek girotuko dute otordua: Beñat Iguaranek (Amasa), Adur Gorostidik (Larraitz) eta Imanol Lizarazu "Habana"-k (Igeldo). Ekitaldirako txartelak salgai daude 16 euroren truke, Txirristran, Aitzagan eta Etumeta AEK euskaltegian.
Antolatzaileek herritarrak ekitaldiotan parte hartzera animatzen dituzte. Gaurko eta biharko ekitaldien berri, segidan:
Martxoak 22, ostirala
22:00 Pin pon txapelketa frontoian (izen ematea, 21:30etan).
Martxoak 23, larunbata: 18. Korrika Usurbilen
11:00 Buruhandiak Kaxkoan.
11:00 Txokotan palaz frontoian.
15:44 Aginagatik sartuko da Korrika 18.
16:33 Korrika 18 Kaxkoan.
18:00-20:00 Erromeria frontoian.
21:00 Bertso afaria, Agerialdeko jangelan, Beñat Iguaran (Amasa), Adur Gorostidi (Larraitz) eta Imanol Lizarazu "Habana" (Igeldo) bertsolariekin. Txartelak salgai 16 eurotan, Txirristran, Aitzagan eta Etumeta AEK euskaltegian.
Antolatzailea: Korrika Batzordea.