Euskararen erabileraz hausnartzera bultzatuko gaituen emanaldia antolatu du Udarregi Ikastolak, Ikastola Egunaren bezperatarako, ostiral honetarako, maiatzaren 31rako. "Euskararen espektakulue" izeneko bakarrizketa saioa hain zuzen, gaueko 22:00etatik aurrera Sutegiko auditorioan. Oihan Vega irrati esatari eta telebistako aurkezle ezaguna igoko da kultur etxeko oholtza gainera. Bakarrizketa saioa, musika, kantu eta zineaz lagunduta eskainiko du. Ekitaldirako sarrerak aldez aurretik eskura daitezke, 2 eurotan Bordatxo tabernan. Edo emanaldi egunean bertan, 4 euroren truke.
Hauxe, "Euskararen espektakulue" saioari buruzko sinopsia: "Zergatik praktikatzen dugu sexua erdaraz? Nork daki euskaraz iraintzen? Eguneroko bizitzan, zergatik jotzen dugu horrenbeste erdarara? Umorea eta sarkasmoa erabiliz, euskararen erabileraren inguruko hausnarketa egitera gonbidatzen du Oihan Vegak bakarrizketa dibertigarri eta ironiko honekin, musikaz, kantuez eta zineaz lagunduta. Etengabe bilatzen du publikoaren parte hartzea, galdera zuzenak eginez eta jendearen artean giro ona eraikiz, elkarrekin, umorearen bitartez, euskarari buruzko gogoeta egiteko. Erritmo biziko antzezlan fresko eta ulerterraza da. Euskararen Espektakuluek ez du inor axolagabe utziko. Eta batez ere, une dibertigarri eta barregarri bat igarotzeko aukera aparta eskaintzen du bakarrizketa honek".
Ikastola Egunari begira, hauexek dira, aste osorako antolatu dituzten ekitaldiak:
Maiatzak 28, asteartea
18:30 Udarregi Ikastolaren urteko ohiko batzarraren bigarren zatia Udarregi Ikastolako erdiko aretoan.
Maiatzak 29, asteazkena
18:30 HH5 eta LH 5ekoen kantagintza saioa Sutegiko auditorioan.
Maiatzak 31, ostirala
17:00-18:15 Haurrentzako jolasak, Gaztetxekoen laguntzarekin.
18:15-19:00 Txokolate egin berria haurrentzat.
Ondoren, buruhandi txikien desfilea (haurrek etxetik ekar ditzakete dituzten buruhandiak).
22:00 “Euskararen espektakulue” emanaldia Sutegiko auditorioan.
Sarrerak: 2 eurotan aldez aurretik Bordatxon, 4 eurotan egun berean. Antolatzailea: Hitz Aho Udarregi Ikastolako Guraso Elkartea.
Ekainak 2, igandea
9:00-11:30 LH eta DBHko ikasleekin jolasak ikastolako patioan.
10:00-13:30 Teknologia eta eskulanen erakusketa ikastolan.
12:00 HH-koen ikuskizunak 25 urte, Oiardo Kiroldegian. Imanol Urbietari omenaldia.
14:30 Bazkaria frontoian. Sarrerak salgai Ikastolako idazkaritzan.
Ondoren, dantzaldia.
Antolatzailea: Udarregi Ikastola.