Aitzaga Elkarteko ordezkaritza, azaroaren 26rako deitu dute deklaratzera

Hedabideek azken orduotan iragarri moduan, urriaren 17an hasiko da Batasunaren aurkako makroepaiketa. Aieteko Konferentzia ospatu zeneko bigarren urtemuga egunean hain zuzen. Ezker Abertzaleko 40 kide epaituko dituzte Madrilen, otsailaren 17ra bitartean. Guztiei, ETAri loturiko proiektu politiko batean parte hartzea egozten diete. 35/02 zenbakidun sumario horren barruan dira baita, 75 herriko taberna ere. Elkarte guztiok ere deklaratzera deitu ditu Auzitegi Nazionalak, arduradun zibil moduan, auziperatuekin batera. Usurbilgo Aitzaga Elkartea tartean.

NAIZ.info atariak Auzitegi Nazionalak kaleraturiko oharra ezagutzera eman du. Auziperatu eta elkarte bakoitzak epailearen aurrera noiz agertu behar duen zehazten da bertan. Aitzaga Elkarteko ordezkaritza azaroaren 26an, goizeko 10:00etan deitu dute deklaratzera, Auzitegi Nazionalak San Fernando de Henaresen duen egoitzan.

Aipatu epaitegitik kaleratu duten autoa irakurtzen hasita, bada "bitxikeriarik". Badirudi auzitegiko autoa idatzi duenak ez zuela oso argi Usurbilgo herriko tabernak ze izen duen. Bitan agertzen da Irazu kaleko elkartearen izena, kakotxa artean Aitzaga dela dio, baina ondoan, dokumentu honen egileak argi izango ez balu bezala, "Ahí Saga" izena jaso du. Itxura denez, badaezpada edo.

2002tik datorren prozedura
Lau hilabete barru abiatuko den epaiketaren prozedura ordea atzetik dator. Auzitegi Nazionaleko Baltasar Garzon epaileak abiatu zuen 2002ko abuztuan. Une hartan, hamaika lagun atxilotu eta 75 herriko tabernen kontu korronteak blokeatzea agindu zuen. Tartean, Usurbilgo Aitzaga Elkartekoa. 

Baina elkarteak eta tabernak irekita jarraitu zuten, beste lau urtez. 2004an Aitzaga ireki zuteneko hamargarren urteurreneko jaialdia ere ospatu zuen, ordurako jada 120 bazkide zituen elkarteak. Baina halakoetan gertatu ohi den moduan, duela hamaika urte abiaturiako prozedura hark ondorio gehiago ekarri ditu denbora tarte honetan. 2006ko otsailaren 11n, Auzitegi Nazionaleko Fernando Grande-Marlaskaren aginduz, Guardia Zibilak Aitzaga elkartea eta taberna itxi zituen. 

Aitzaga itxi bakarrik ez, deklarazioa hartzeko inputatu zituzten Aitzagako zenbait kide, "talde armatuko kolaboratzaile gisa". Ez zieten ezer leporatu baina Aitzaga bi urterako ixteko agindua eman zuten. Gertaerok jazo eta egun gutxira, Aitzagako kideek NOAUA!ri argi adierazi zioten (egun haietan Aitzagako kideek egin zuten agerraldia, ondoko irudian), gerora, itxiera urteetan mantenduko zuten konpromisoa: "Bilgunea kendu digute. Baina elkarte bezala funtzionatzen jarraituko dugu". Hasiera batean, bi urterako ixteko agindua eman arren, Aitzaga sei urtez egon zen itxita azkenean. Aipatu moduan ordea, tarte horretan, egoitza itxita egon arren, hainbat ekimen antolatzen jarraitu zuten. 

Kultur eta kirol ekimen askoren sustatzaile izan baita Aitzaga, 1994. urtean ireki zutenetik: pilota txapelketak, azokak... Partaide izan da baita, herriko ekimen askotan. Eta beste talde batzuen azpiegitura lanak ere egin ditu Aitzagak. Herri mugimenduei baina bereziki herriko taldeentzat ateak irekiak izan ditu beti.

Kateak kendu zituztenetik urtebetera, epaiketa
Bi ez, aipatu moduan sei urte igaro behar izan ziren, Aitzagako ateak irekitzeko. Abertzale eta ezkertiarren bilgunea 2012ko otsailaren 2an ireki zuten berriz, Auzitegi Nazionalak itxiera bertan behera uzten zuen autoa kaleratu ostean. Albistea jakin bezain laster, Usurbilgo Ezker Abertzaleak ongi etorri ekitaldia antolatu zuen. "Orain, Aitzagari ongi-etorri goxoa egitea tokatzen zaigu", iragarri zuten. Taberna atarira gerturatzeko gonbita luzatzen zieten herritarrei. Eta herritar ugari gerturatu zen iazko otsailaren 2ko inaugurazio ekitaldira, egun hartako elurrari eta hotzari aurre eginez.