Zubietan eraiki asmo zegoen errauste planta, iraganeko kontua dela berrestera datorren albistea zabaldu da hedabideetan. Behin behinean artxibatu egin baitituzte, Gipuzkoako Hondakinen Kontsortzioak aipatu egitasmoa gelditzeko hartutako erabakiaren aurrean, EAE-ko fiskal nagusiak hasiak zituen diligentziak. Berriak jaso duenez, "ez baitago nahikoa frogarik kereilarik edo salaketarik jartzeko".
Uztailaren 12an jakinarazi zuen Kontsortzioak, erraustegia eraiki asmo zuten enpresekin zituzten kontratuak eteteko asmoa. Eta horren haritik EAEko fiskal nagusi Juan Kalparsorok, Kontsortzioak hartutako erabaki hark eragin zezakeen "desfase ekonomikoari" buruzko ofiziozko ikerketa abiatuko zuela jakinarazi zuen. Aipatu moduan, zazpi hilabete beranduago jakin denez, froga faltagatik abian zeuden diligentziak artxibatu dira behin behinean.
Azpiegitura alternatiboen aurkezpena, otsaileko azken astean
Hondakinen kudeaketari loturiko ika-mikak alboratu eta orain, arduraz jokatzeko garaia dela dio Gipuzkoako Foru Aldundiko ingurumen diputatu Iñaki Errazkinek, epaitegietatik heldu den albiste hau jakin ostean. “Fiskalak ez du aurrera jarraitzeko arrazoirik ikusi. Erraustegia alboratzeko erabakia zuzena eta legezkoa da. Ez hori bakarrik: ona da ingurumenarentzat eta gipuzkoarren osasun eta ekonomiarentzat”, adierazi du.
Adostasunak bilatu eta erabakiak hartzekoa unea da orain, arduratsu jokatzeko garaia Errazkinen esanetan. "Denok arduraz jokatu behar dugu gai honetan: ordezkari instituzionalek, alderdi politikoek, komunikabideek… Hondakinei buruzko polemikaren garaia bukatu da. Beste eszenatoki batean gaude, non hondakinak modu arrazional eta iraunkorrean eta adostasunez kudeatzeko aukera izango dugun. Utz ditzagun alde batera higatze estrategia antzuak, eta elkarrekiko errespetutik eraiki dezagun denon artean hondakinak kudeatzeko Gipuzkoak behar duen sistema”, luzatu du gonbita ingurumen diputatuak.
Gai honi lotuta, garai berri honetan eman asmo duen hurrengo urratsa iragarri du Foru Aldundiak: etorkizunean, prebentzioan eta birziklapenean oinarrituko diren hondakinak kudeatzeko azpiegitura alternatiboen berri emango diete Batzar Nagusietan ordezkaritza duten talde politikoei. Bi aste barru izango da; otsailaren 24an eta 26an.
Erraustegia eraikitzeko indarrean diren kontratuak eteteko protesta ekintza
Aurreko legegintzaldian Foru Aldundiak eta Gipuzkoako Hondakinen Kontsortzioak, Europako Banka Publikoa, La Caixa eta Banesto bankuekin sinatu zituzten kontratuok etetea eskatu du goizean Errausketaren Aurkako Herri Plataformen Koordinakundeak, Donostiako Askatasunaren Hiribidean burutu duen protesta ekintza baten bidez.
Ondoko irudian ageri diren moduan, erraustegiko tximinia moduko bat jarri dute, kontratuok indarrean mantentzen dituzten La Caixako egoitza atarian. Elkarretaratze unean bertatik pasatzen ari ziren oinezkoei eskuorriak banatzen aritu dira Koordinadorako ordezkariak. Ekimen honen bidez, aipatu moduan, indarrean jarraitzen duten maileguok bertan behera uztea eskatu dute.
Honekin bukatzeko bi bide daude, euren esanetan: "bata, bankuek kontratuak berrikustea, ezabatzea, epaitegietara joan behar izan gabe, Erresuma Batuan egin zuten bezala. Honetarako herritarren presioa behar beharrezkoa izango da. Bestea, epaitegiek La Caixa eta Banesto kontratuak eta sortutako zorra ezabatzera eta kobratutako dirua itzultzera behartzea. Honetarako Gipuzkoako erakundeek dagokion auzi-eskea egina dute eta epaiketa otsailean egitekoa da".
"Dena ondo lotuta uzteko" sinaturiko maileguak
Maileguon atzean, zenbateko dirutza dagoen gogorarazi dute berriz Errausketaren Aurkako Herri Plataformen Koordinakundetik:
-Europako Banka Publikoarekin: 195 milioi euro.
-La Caixa eta Banesto bankuekin: 68 milioi euroko inbertsioa azpiegituren mantentze lanetarako eta beste 5 milioi euro BEZa ordaintzeko.
Gogoan dute, 2011ko udal eta foru hauteskundeetarako bost egun baino falta ez zirela sinatu zituztela maileugok, orduko Foru Aldundi eta GHK-ordezkariek, EAJ-PNV, PSE-EE eta PPren babesarekin, eta bi helburu betetzeko asmoz, "Zubietako erraustegia eraikitzeko behar ziren 473 milioiak lortu eta dena ondo lotuta uzteko", Koordinadoratik gaur salatu dutenez.
Maileguok indarrean diren bitartean, "Gipuzkoako erakundeek hilero ordaindu behar dituzte interesak, nahiz eta mailegurako ez erabili". Eta bada beste eragin bat ere; "mailegu honi uko eginez gero, bankuek kalte-ordain handia kobratzeko eskubidea izango lukete". Horregatik, bankuotako baten atarian bildu dira goizean, maileguok bertan behera uztea eskatzeko.