Euskarazko zazpi film labur proiektatu genituen bart Sutegin. Laburbiraren baitan eskainitako ikus-entzunezko lan hauetako baten, "Abuztua" izeneko laburmetraiaren zuzendaria ere kultur etxeko auditorioan izan genuen. Pello Gutierrezek bere sortze lan prozesua azaldu zigun. Udako oporraldian, etxean amona zaintzen geratzen den bilobaren istorioa kontatzen du "Abuztua" film laburrak. Gutierrezen esanetan, berak lehen pertsonan etxean bizitako egoeratik abiatzen da ikus-entzunezko honen sortze lana.
Euskal Herrian ekoitzi eta denetariko gaiak jorratzen dituzten beste sei film labur ere proiektatu genituen. Guztiak euskaraz eta Euskal Herrian ekoitziak;"Aio", "Euskaldun berriaren esketxa", "Irudi mintzatuen hiztegi poetikoa", "Marylin", "Plaza bakarra", eta "Sormenaren bide ezkutuak". Datorren urtean gehiago.
NOAUA!ko bazkideen batzarra astelehenean
Bi deialdi finkatu ditugu, lehena arratsaldeko 19:00etarako. Bigarrena eta azkena, ordu erdi beranduago, 19:30etan. NOAUA! Kultur Elkarteko bazkideen urteko batzar nagusia, Potxoenean egingo da.
Lehendakariak bertaratzeko gonbita luzatzen dizue bazkideoi:
Kaixo lagun,
Iritsi zaigu pasa berri den 2013 urteak zer utzi digun aztertzeko eta, bestetik, 2014ak zer ekarriko digun aurreikusteko garaia. Honetan guztian gure elkarteko bazkide zaren horrek baduzu zeresanik. Hau dela eta, Noaua! Kultur Elkartearen BATZAR NAGUSIRA etortzeko gonbidapena luzatu nahi dizugu. Animatu eta etorri, bazkideen laguntza eskertuko bai dugu.
Kontua da, aurtengo Batzarrean, urtero moduan, agian izango dela lagunen bat errelebo eske. Egia esan, nahiko lan zaila izaten da ordezkoen izenak bururatzea, eta are zailagoa baietza jasotzea. Aurtengo erronka izango da, lan-talde berritu bat ateratzea batzar orokorretik, eta horrela indar berritu egin nahi dugu kultur ekintzak antolatzeko taldea. Beraz, badakizue, animatu!!! Ea lan-talde indartsu eta gogotsu bat osatzen dugun.
Horrekin batera esan BAZKIDE berriak lortzeko kanpaina berri bat genuela, eta ez genituela asko lortu. Aurten saiatuko gara bazkide berri gehiago lortzen. Zuen inguruko norbait, bazkidetza egiteko asmoz ikusi ezkero animatu eta gonbidatu gurekin izatera.
Azkenik, gogoratu: 500 bazkide gara eta kuota ordaintzearen truke hainbat onuraz balia gaitezke, baina Elkartearen nondik norakoak ezagutzea eta erabakietan laguntzea ere badela denon lana.
Aurtengo batzarra Potxoenean ospatuko dugu datorren martxoak 24an, astelehena, iluntzeko 19:00etan lehenengo deialdia eta 19:30tan bigarrena.
Bertan besteak beste ondorengo gaiak izango ditugu hizpide:
1.-2013ko memoria eta balantze ekonomikoa.
2.-2014ko egitasmoak eta aurrekontuak.
3.-Zuzendaritza Batzordearen osaketa eta onarpena.
4.-Galdera/ erantzunak.
Zain izango gaituzu, adeitasunez,
Ana Aizpurua Irazusta