Ustezko delituak preskribatuta daudelako, Egunkariaren aurkako auzi ekonomikoa artxibatzea erabaki du epaileak, 11 urteren ostean. Erabaki honen harira, agerraldia eta elkarretaratzea deitu dituzte ostiral goizeko 11:30etan, Andoaingo Martin Ugalde kultur parkean.
Gogoan izan, joan den apirilaren 7an auzi honi loturiko aurretiazko saioa egin zuten Donostiako epaitegietan. Orduan, kasu honetan auziperatuak zeuden zortzi lagunen aurkako zigor eskaerei eusten zien Espainiako Estatuko Fiskaltzak.
Defentsak, auzia artxibatu eta akusatuak absolbitzea eskatu zuen, bi argumentuetan oinarrituta. Fiskaltzaren txostenean jasotako egitateen eta ustezko delituen artean loturarik ez dagoela eta ustezko delituok preskribatuak daudela zioen Iñigo Iruin abokatuak. Saio hura amaituta, epaileak zuen azken hitza. Bere esku zegoen, ahozko epaiketa abiatzea edo ez. Asteazken honetan hedabideek zabaldu dutenez, epaileak auzia ixtea erabaki du.
Donostiako epaitegien esku zegoen auzia, 2010eko maiatzean eta delitu "terroristaren" zantzurik ez zegoela iritzita, Espainiako Auzitegi Nazionalak Egunkariaren auzi ekonomikoaren aurkako epaiketa ez zuela egingo erabaki ostean. Hamaika urteren ostean dator, Egunkariaren auzi ekonomikoaren itxieraren albistea.
Joan Mari Torrealdai, auziperatuen artean
Zortzi lagun auziperatu zituzten, Egunkaria itxi eta zortzi hilabetera, Auzitegi Nazionaleko epaile Juan del Olmo epailearen aginduz, 2003ko urriaren 16an burutu zen polizia operazioaren haritik. Usurbildar bat tartean; Joan Mari Torrealdai. Eta berarekin batera, beste zazpi lagun: Joxe Mari Sors, Ainhoa Albisu, Iñaki Uria, Txema Auzmendi, Mikel Sorozabal, Fernando Furundarena eta Begoña Zubeltzu. Hauexek dira, zortzi lagunon aurka egin zituzten zigor eskariak:
128 urte eta 221 milioi euroko eskaera
Akusazioa: ustez Egunkariaren 1998-2001 urte arteko diru kontuak faltsutzea eta diru laguntzak eskuratzeko iruzurrak egitea.
Zigor eskaerak: 128 urte eta 221 milioi euroko isuna 8 auzipetuentzat:
-Joan Mari Torrealdai, Joxe Mari Sors, Ainhoa Albisu, Iñaki Uria eta Txema Auzmendirentzat: 18na urteko espetxe zigorra eta 31 milioi euro.
-Mikel Sorozabal eta Fernando Furundarenarentzat: 12na urte pasatxo eta 21 milioi euro.
-Begoña Zubeltzurentzat: 9 urte eta 20 milioi euro.