Oso gertutik jarraituko dute hedabideek, igandeko giza-kate historikoa. NOAUA!ko web orrialde honetan bertan, albiste zutabe honen ondoan, "Nabarmenduak" atalean, streaming bidez zuzenean jarraitu ahalko duzue euskaldunon erabakitze eskubidearen aldeko giza-katea. Sare sozialen bidez ere egunak ematen duena goizean goizetik berri ematen joango gara, Twitter edota Facebook bidez. Txiolariontzako oharra. Twitter bidez, igandean giza-kateko argazki edota mezuak bidaltzeko asmotan zaudetenok, honako traolak balia ditzakezue:
#GureEskuBideaE8
#GeukErabaki
#GureEskuDago
#gizakatea
#90km
Irudi, datu eta bizipen uholdea lau haizeetara zabaltzeko eguna izango da igandekoa. Giza-katearen zuzeneko jarraipena, elkarlanean egingo dugu hainbat hedabideek. Plataforma anitzetan, igande goizean goizetik hasita. Elkarlan horretan daude, Naiz, Gara, Berria, Hitzak, Goiena, Hamaika Telebista, Argia, Aiaraldea, Anboto, Pil-Pil, Barren, Goierri Telebista, Guaixe, Hitzondo, Librean zuzenekoak, Piztu, Ahotsa, Arrosa irrati sarea, Info7, Tolosaldeko Ataria, 25 Geltokia, Topatu edota NOAUA! beste hainbat hedabiderekin batera kide duen Tokikom.
Gure Esku Dago taldeak duen web orrialdetik ere noski, gertutik jarraituko dute ekainaren 8ko giza-katea. Hauxe helbidea: gureeskudago.net
Irrati bidez jarraitu nahi baduzue giza-katea, adi; ekainaren 8an, sintonizatu Info7 irratia, Arrosa irrati sarearekin batera elkarlanean egingo duten irratsaio berezia. Uharte-Arakilen, 107.3 fm frekuentzian sintonizatuta entzun ahalko duzue. Giza-kate historikoak emandakoa bestalde, igande gaueko 22:05etik aurrera, Hamaika Telebistan ikusgai izango duzue.
