"Gaur, berriro ere, ekaitzak joko du. Goiza lasai joango da, oro har, eguzkitsu, baina arratsaldean eta gauean zaparrada trumoitsuak botako ditu. Zaparradak irregularki banatuko dira; zenbait puntutan euri gutxi egingo du, baina beste bazter batzuetan gogotik bota dezake. Baliteke txingorra egitea eta ekaitz-guneetan haize-bolada zakarrak izatea. Tenperatura maximoak bizpahiru gradu jaitsiko dira", Euskalmet agentziaren iragarpena astelehen honetarako.
"Prezipitazio handiagatik" abisu horiaren eraginpean jarraituko dugu irailaren 8 honetan, Eguerdiko 12:00etatik gaueko 22:00etara, "ordubetean 15 l/m2 baino gehiago pilatzeko probabilitatea txikia da, bereziki ekialdean. Zaparrada txiki-ertainak eta trumoitsuak botako ditu, zenbait lekutan handiak izateko, txingorra egiteko eta haize-bolada gogorrak izateko probabilitatea txikia da, bereziki ekialdean".
Eguraldiak bihar hobera egingo omen du. "Asteartean eguraldiak hobera egingo du; ekaitzak izateko arriskua txikiagoa izango da. Ia egun osoan giro eguzkitsua izango dugu. Arratsaldean bero-hodeiak garatuko dira, baina zaila izango da zaparradak botatzea. Haizea aldakor eta ahul ibiliko da goizean, eta arratsaldean ipar-ekialdekoa nagusituko da. Tenperaturan aldaketarik ez edo gutxi igoko dira", Euskalmet-en esanetan.